Në ditën e ndeshjes, selektori i Kombëtares së Kosovës në basketboll, Jean-Denys Choulet ka publikuar listën finale të lojtarëve për duelin me Azerbajxhanin.
Kosova dhe Azerbajxhani përballen sot prej orës 19:30 në Prishtinë, ndeshje kjo që i takon parakualifikimeve evropiane për Kupën e Botës 2027.
Prej listës së zgjeruar me 14 lojtarë, francezi Choulet për këtë ndeshje llogarit në 12-të basketbollistë, duke lënë jashtë Meriton Ismailin e Bashkimit dhe Jon Ismajlin e Sigal Prishtinës.
Dueli me Azerbajxhanin është shumë i rëndësishëm për Kosovën kurse lojtarët në të cilët do të bazohet selektori Choulet, janë: Divine Myles, Valon Bunjaku, Musab Mala, Dardan Kapiti, Gëzim Morina, Mikaile Tmushiq, Arian Qallaku, Dardan Berisha, Drilon Hajrizi, Rron Ukaj, Muhamedali Janjeva e Lis Shoshi.
“Dardanët”, aktualisht kanë një fitore dhe tri humbje në katër ndeshje të luajtura deri më tani në Grupin A, ndërsa synimi i tyre është që të kualifikohen në fazën tjetër si kombëtarja e dytë më e mirë.
