Selektori i ri i Kombëtares së Kosovës në basketboll, Jean-Denys Choulet do të jetë në Kosovë përpara grumbullimit me “Dardanët” për ndeshjet e këtij muaji në kuadër të parakualifikimeve për Botërorin 2027.
FBK-ja, ka njoftuar se Choulet të premten do të jetë në Kosovë, ku fillimisht do të takohet me drejtuesit e federatës dhe pastaj do të njoftohet me pjesën tjetër të stafit.
Gjithashtu, Choulet gjatë vikendit do ti përcjell ndeshjet e xhiros së nëntë të Superligës së Kosovës në basketboll për të parë formën e lojtarëve dhe pastaj të hënën do ta ketë konferencën për media për të shpalosur planet dhe synimet e tij me “Dardanët”.
Kosova më 12 nëntor e nis grumbullimin për ndeshjet në udhëtim me Zvicrën më 21 nëntor dhe pastaj më datën 24 do të përballet edhe me Irlandën.
Choulet javë më parë ka firmosur kontratë trevjeçare me FBK-në, ndërsa në këtë post ka zëvendësuar Rami Hadarin e larguar.
