Kryeministri i Kosovës, Albin Kurti, ka bërë të ditur se gjatë vizitës së tij në Francë është takuar me presidentin Emmanuel Macron, ku kanë zhvilluar një takim të gjatë dhe përmbajtësor.
Sipas Kurtit, biseda mes tyre ka zgjatur rreth dy orë dhe është karakterizuar nga një qasje e hapur dhe e drejtpërdrejtë, duke përfshirë tema kyçe si bashkëpunimi dypalësh, procesi i integrimit, siguria dhe zhvillimi ekonomik.
Ai theksoi se një pjesë e rëndësishme e diskutimit i është kushtuar perspektivës së Kosovës për anëtarësim në Bashkimin Evropian dhe organizata të tjera ndërkombëtare, si dhe rolit të NATO në garantimin e sigurisë dhe stabilitetit në rajon.
Kurti shtoi gjithashtu se gjatë takimit janë trajtuar edhe çështje që lidhen me fuqizimin e kapaciteteve mbrojtëse të vendit, si dhe marrëdhëniet me vendet fqinje, me theks të veçantë në situatën në veri të Kosovës.
“Të premten isha mysafir i presidentit të Francës, Emmanuel Macron, në një takim, drekë pune. Pritja e përzemërt u përcoll me një diskutim të thellë dhe të sinqertë për rreth dy orë, që u përqendrua në temat e bashkëpunimit, integrimit, sigurisë, mbrojtjes dhe ekonomisë e zhvillimit”, tha Kurti gjatë mbledhjes së Qeverisë. /teve1.info/
