Dogana e Kosovës ka realizuar sot, një aksion kontrolli në një subjekt afarist në Prishtinë që merret me shitjen e telefonave mobil, pas pranimit të një informacioni nga qytetarët përmes linjave të hapura për raportimin e kontrabandës.
Gjatë kontrollit të detajuar nga njësitet doganore, në një hapësirë të fshehur (bodrum) u gjet një kasafortë në të cilën ishin fshehur pajisje të shumta telefonike, përkatësisht:
49 copë iPhone 16 Pro Max
1 copë iPhone 16 Pro
12 copë iPhone 15 Pro
9 copë Samsung A36 5G
6 copë Samsung A56
2 copë Samsung A26
Të gjithë telefonat janë gjetur pa dokumentacion përkatës dhe dyshohet se janë futur në mënyrë të paligjshme në Kosovë. Vlera e përgjithshme e tyre në treg arrin rreth 64,340 euro.
Dogana ka sekuestruar mallin dhe ka nisur procedurat përkatëse ligjore ndaj subjektit afarist, duke trajtuar rastin si kundërvajtje apo vepër penale, varësisht nga të gjeturat e hetimeve të mëtejshme.
Në njoftim, Dogana e Kosovës falënderon qytetarët për bashkëpunimin dhe inkurajon të gjithë që të vazhdojnë të raportojnë rastet e dyshimta përmes linjave të hapura, duke theksuar rëndësinë e këtij bashkëpunimi në luftën kundër kontrabandës dhe krimit të organizuar.
