Sindikata e Sektorit Privat të Kosovës, është shprehur e shqetësuar me trajtimin e qeverisë rreth pagave dhe beneficioneve tjera, raporton teve1.info
Parmes një konference për medie, kryetari i kësaj Sindikate, Jusuf Azemi, tha se është i pakënaqur për trajtimin e sektorit privat nga ana e Qeverisë.
Azemi e ka kritikuar Qeverinë se po “sillet sikur inflacioni po i prek vetëm punëtorët e sektorit publik”.
Ai ka kërkuar që të ndihmohet edhe sektori privat, sepse, siç tha ai, buxheti i Kosovës u takon të gjithëve, e jo vetëm sektorit publik.
“Në Zyrën e Kryeministrit të Kosovës, punëtorët që mirëmbajnë këtë zyre, paguhen 180 euro. Kjo është shumë shqetësuese për ne. Këto paga të ulëta vijnë nga Qeveria e Kosovës. Në vend që Qeveria ta motivojë sektorin privat për paga më të larta, është ajo që i paguan kaq pak punëtorët teknik. Qeveria po sillet sikur inflacioni po i prek vetëm punëtorët e sektorit publik, e jo ata të sektorit privat. Buxheti i Kosovës është buxhet i të gjithëve. Klasa më e pasur, ajo e sektorit publik u financua, e pikërisht ajo që është më e varfër jo”, ka thënë ai.
Përfaqësuesit e Sindikatës së Sektorit Privat në Kosovë kanë reaguar disa herë për mospërfshirje në ndihma financiare nga Qeveria e Kosovës me pakon e ringjalljes ekonomike, rritje të pagave me ligj e përmirësim të kushteve të punës në këtë sektor. /EO/
