Kosova ishte stacioni i dytë në Ballkanin Perëndimor i sekretarit të përgjithshëm të aleancës më të fuqishme ushtarake në botë, Jens Stoltenberg.
Shefi i NATO-s fillimisht u takua me Presidenten e vendit, Vjosa Osmani.
Pas takimit me dyer te mbyllura ne presidencë, Osmani dhe Stoltenberg iu drejtuan medieve.
Osmani deklaroi se nëse Serbia nuk përballet me asnjë masë për sulmin në Bansjkë, atëherë sipas saj do të jetë inkurajim për sulme të tjera.
Ndërkaq, shefi i NATO’s, Jens Stoltenberg, ka thënë po shqyrtojnë nëse duhet të ketë një shtim të përhershëm të pranisë së aleancës ushtarake në Kosovë.
“Jemi në proces të vlerësimit të nevojës për një prezencë më të qëndrueshme të forcave tona, për të parandaluar çdo situatë që mund të dal nga kontrolli dhe të çojë në përshkallëzim të dhunës në Kosovë ose në rajonin më të gjerë. Ne jemi të përgatitur të ndërmarrim të gjitha masat e nevojshme. Momentalisht, janë duke u bërë rishikime të dispozitave që rregullojnë praninë tonë në terren”, tha Sekretari i Përgjithshëm i NATO-s, Jens Stoltenberg.
E sa i përket sulmit në Banjskë, Stoltenberg, ka kërkuar që autorët duhet të dalin para drejtësisë.
“Në shtator, incidentet e dhunshme në veri të Kosovës na kujtuan rrezikun e një konflikti më të madh që mund të shpërthejë në Ballkanin Perëndimor. Gjatë një sulmi në maj, 93 ushtarë të NATO-s u plagosën seriozisht, disa prej tyre iu nënshtruan plagëve që do t’i shoqërojnë për gjithë jetën. Sulmet e tilla janë të papranueshme dhe kërkojmë që përgjegjësit të mbahen llogaridhënës”, u shpreh Stoltenberg.
Stoltenberg po ashtu mirëpriti draft-statutin e ri për themelimin e Asociacionit të komunave me shumicë serbe.
Shefi i NATO-s tha qe Themelimi i Asociacionit “do të ishte një hap kyç drejt normalizimit të raporteve dhe drejt paqes së qëndrueshme në rajon”.
I pyetur për mundësinë që Kosova të bëhet pjesë e Programit të Partneritetit për Paqe të aleancës ushtarake perëndimore, Stoltenberg tha se për këtë kërkohet vendim unanim i të gjithë anëtarëve të aleancës.
Pas Osmanit, Stoltenberg u takua edhe me kryeministrin e vendit, Albin Kurti.
Pas Kosovës, sekretari i NATO-s do të udhëtoj për në Beograd, ku do të takohet me Presidentin serb, Aleksandar Vuçiq.