Deputetët e Lëvizjes Vetëvendosje do të jenë në vazhdimin e seancës konstituive më 9 shtator, tha lideri i kësaj partie, Albin Kurti. Megjithatë, ai nuk tregoi nëse do të propozojnë kryetarin e legjislativit për t’u funksionalizuar legjislatura e njëmbëdhjetë.
Kurti, në seancën konstituive më 6 dhe 8 gusht, nuk ka propozuar kryetarin e Kuvendit, meqë, sipas tij, i është dashur kohë për arritjen e një marrëveshjeje politike për çështjen e presidentit.
“Nesër e kanë thirrur seancën e Kuvendit, do të jemi aty”, tha ai.
LVV dhe LDK më 31 gusht kishin arritur marrëveshje që Bekim Sejdiu të propozohet për president të vendit. Këto dy parti, bashkë me minoritetet jo-serbe, i kanë 80 vota të nevojshme për ta zgjedhur presidentin.
Mirëpo, në mbledhjen e Grupit Parlamentar të LDK-së më 1 shtator u bë e ditur se gjashtë deputetë të kësaj partie nuk do të mundësojnë zgjedhjen e Sejdiut për president.
Pavarësisht kësaj, Kurti tha se do të vazhdojë përpjekjet për takime dhe bisedime me liderët e partive politike për ta zgjedhur presidentin.
“Vazhdojmë me takime dhe bisedime në mënyrë që të zgjedhim presidentin dhe të mos kemi nevojë t’i përsërisim zgjedhjet që janë të paarsyeshme dhe të kushtueshme… Jemi vazhdimisht në komunikim me të tjerët dhe besoj që duhet t’i shtroni pyetje atyre që po thonë që do ta bojkotojnë zgjedhjen e presidentit”, tha ai.
Të mërkurën është caktuar vazhdimi i seancës konstituive nga kryesuesi Avni Dehari. Pavarësisht kritikave se Kuvendi nuk është konstituuar brenda afatit tridhjetëditor, PDK dhe LDK kanë konfirmuar se deputetët e tyre do të jenë të pranishëm në Kuvend.
Kuvendi i Kosovës ende nuk është konstituuar, pasi në dy tentimet e deritanishme nuk është arritur të zgjidhet kryetari i Kuvendit dhe të përmbyllet procesi i konstituimit të Legjislaturës së 11-të./kp
