Basketbollisti i Golden Eagle Yllit, Scott Bamforth ka vazhduar me paraqitje të mira në Superligën e Kosovës, gjë që i është shpërblyer me epitetin e më të mirit të javës.
Federata e Basketbollit të Kosovës (FBK), ka njoftuar të hënën se Bamfort është shpallur “MVP i Javës” duke fituar çmimin e lojtarit më të mirë për xhiron e 16-të.
Për amerikanin me pasaportë të Kosovës, kjo është hera e parë që merr këtë çmim, ndërsa ishte më i merituari në fitoren e Yllit në udhëtim ndaj Pejës.
Në këtë triumf të Yllit në Pejë, Bamforth kontribuoi me 27 pikë, 4 kërcime e 5 asistime dhe krahas çmimit “MVP”, ai u përfshi edhe në “Top-5” të javës.
Krahas Bamforthit në “Top-5”, kanë zënë vend edhe Lejson Zeqiri i Bashkimit, pastaj Mustapha Amzil i Trepçës dhe dyshja e Borës, Shaquan Jules e Tyler Cheese.
Zeqiri me 21 pikë, 6 kërcime e 3 asistime ishte më efikasi në fitoren e Bashkimit ndaj Rahovecit 029, Amzil me 14 pikë, 7 kërcime e 2 asistime ndihmoi Trepçën ta mposht Vëllaznimin kurse në fitoren e Borës u veçuan amerikanët Jules e Cheese.
Jules regjistroi 24 pikë e 8 kërcime kurse Cheese pati 20 pikë, 9 kërcime e 4 asistime në triumfin e Borës ndaj Sigal Prishtinës.
