Sindikata e Bashkuar e Arsimit, Shkencës dhe Kulturës ka uruar mësimdhënësit, nxënësit dhe prindërit për fillimin e vitit të ri shkollor.
SBASHK u ka premtuar nxënësve, mësimdhënësve si dhe prindërve që bashkarisht do t`i tejkalojnë sfidat e përvitshme me të cilat do të përballen.
“SBASHK uron mësimdhënësit, nxënësit dhe prindërit për vitin e ri shkollor. Të nderuar mësimdhënës, nxënës dhe prindër po fillojmë edhe një vit shkollor për të vazhduar betejat për dije dhe arritje të reja. Edhe në këtë vit shkollor do të përballemi me shumë sfida, por bashkërisht mund t’i tejkalojmë më lehtë”, thuhet në njoftim.
Po ashtu, SBASHK-u ka njoftuar se janë duke u përpjekur që përmes dialogut të gjejnë zgjidhje për kërkesat e anëtarësisë, mirëpo nëse dialogu nuk jep asnjë rezultat, ka paralajmëruar veprime sindikale.
“Të nderuara anëtare, të nderuar anëtarë të SBASHK-ut, ne jemi në vazhdimësi të angazhimeve që me dialog të gjejmë zgjidhje meritore për kërkesat tuaja legjitime edhe pse nuk e kemi të lehtë sepse Qeveria vazhdon me qasjen e gabuar ndaj dialogut dhe ndaj sindikatave në tërësi. Ne do të vazhdojmë me aktivitetet dhe me komunikimin me institucionet dhe palët tjera me qëllim që të realizojmë gjithë kërkesat e anëtarësisë, por nëse dialogu nuk jep asnjë rezultat, atëherë ne do të respektojmë vullnetin tuaj edhe për veprime sindikale për të cilat vendosin përfaqësuesit tuaj që nga çerdhet e deri në universitete në Këshillin Drejtues të SBASHK-ut”, theksohet tutje në njoftimin e SBASHK-ut./teve1.info/
