Po ashtu, sipas SBASHK, përmes presioneve të ndryshme nga udhëheqës të institucioneve, siç ishte vizita e kryeministrit Kurti në Podujevë, po tentohet që greva të ndërpritet.
Presionet janë të vazhdueshme edhe nëpër disa komuna, shkolla dhe çerdhe, si nga ana e Qeverisë – rasti i djeshëm i vizitës së Kryeministrit Kurti në Podujevë, ashtu edhe nga një numër i vogël i prindërve me fëmijët e tyre (nxënësit) që tentojnë ta thyejnë grevën.
Sipas komunikatës së lëshuar nga SBASHK, kryetari i Jasharaj po tentohet të etiketohet e shantazhohet.
“Këshilli Qendror Grevist i SBASHK-ut, ua përcjell në vazhdimësi tani e 13 ditë rrjedhën e grevës në institucionet arsimore ku ka vërejtur se ditët e fundit ka presione të vazhdueshme ndaj kryetarit të SBASHK-ut z. Jasharaj, duke u munduar ta shantazhojnë e etiketojnë me postime të rrejshme, pastaj përgatitja e tentim sulmit fizik gjatë vizitës së tij që u bëri grevistëve”, thuhet në komunikatë.
Këshilli grevist ka kërkuar nga organet e rendit që t’i përcjellin rastet e tentim sulmit, siç ka shkruar SBASHK, si ai i të hënës ndaj Jasharajt.
“Apelojmë te organet e rendit dhe organet tjera që me vëmendje ti përcjellin rastet si ai i djeshmi ndaj kryetarit Jasharaj dhe tentuesit e prishjes se rendit ti vejmë para organeve të drejtësisë, po ashtu edhe nxitësit të cilët me dezinformata të ndryshme nxisin këto sulme”, thuhet në komunikatën e SBASHK-ut.
Greva e Sindikatës së Arsimit ka filluar më25 gusht, me kërkesë pagesën prej 100 eurove për të gjithë punonjësit e arsimit deri në miratimin e Ligjit të ri të Pagave, ndërkohë grevës iu kanë bashkuar edhe sektorë tjerë publik siç është administrata e shtetit me të njëjtën kërkesë, rritja e pagës.
