Me ftesën e Sindikatës së Bashkuar të Arsimit, me të lindur dielli, 200 mësimdhënës janë mbledhur këtë të mërkurë në stacionin e autobusëve në Prishtinë.
Kësaj radhe jo për të protestuar e as për të hyrë në grevë, por për tu nisur drejt Shqipërisë.
E ky është grupi i dytë i mësimdhënësve që po niset drejt bregdetit shqiptar.
Këtë rrugë po e merr edhe arsimtarja e shkollës “ Filip Shiroka” në fshatin Slivovë të Prishtinës
“Kjo është një shpërblim dhe është një mirënjohje se me të vërtetët siç po e shoh këtu të gjithë koleget janë para pensionimit, se edhe unë veç edhe një vit pensionohem, pra është një lloj shpërblimi për punën me nxënës që e bëjë”, thotë mësimdhënësja Lule Ramadani.
Ramadani e cila ia kushtoi mbi 40 vite arsimit, thotë se puna e mësimdhënësve që nga paslufta është duke u përçmuar.
Por ajo ka një përgjigje për të gjitha ata të cilët po kritikojnë këtë organizim të sindikatës.
“Drejtën me të thënë na mësimdhënësit çdo herë jemi të kritikuar, sidomos prej luftës e këndej na është thënë jo nuk po punon jo nuk e meritoni, jo e keni orarin e shkurtë, ama as prindërit as tjerët, nuk e paramendojnë se na qatë punë që e bëjmë e kemi punë psikike”, shprehet ajo.
E sipas mësimdhënësit, Arsim Thaçi, i cili punon në fshatin Koretin të Kamenicës, pagesa e shpenzimeve bëhet me paratë të cilat këta i paguajnë çdo muaj për anëtarësinë në SBASHK.
“Unë mendoj kjo është kuota e anëtarësisë që paguajmë, kjo është realiteti, dhe është e mirë që një organizatë si SBASHK-ut nuk i keqpërdorin mjetet, por gjen mundësi për me relaksu për 5 ditë brenda vitit, është një nisme e qëlluar përveç trajnime që organizon, seminareve, kuptohet edhe grevave”, thotw ai.
E këtë ekskursion po e sheh të arsyeshëm edhe arsimtari, Zija Zeqiri, i cili këtë të mërkurë mori rrugën nga Gjilani për në Prishtinë.
“Për herë të parë që shkoj që ka organizuar Sindikata e Bashkuar e Arsimit dhe jemi duke shkuar për pushim 3-4 ditë. Është veprim i duhur për të gjthë mësimdhënësit, kjo nuk është hera e parë se edhe me herët e ka organizuar sindikata” , thotë ai.
Për dërgimin e 420 mësimdhënsve në deti, Sindikata e Bashkuar e Arsimit ka shpenzuar mbi 68 mijë euro.
Por sipas kryetarit të sindikatës, mësuesve të Kosovës iu është ofruar një çmim më i lirë se sa turistëve të tjerë.
“Me të tashmen, diku 162 euro duke përfshirë edhe transportin, pra 5 ditë qëndrim , 3 shujta të ushqimit, me fjetjen me çadrën, dhe me të tjera, për një pushues. Fondi ky i krijuar nga buxheti i krijuar adekuat për pushime, dhe unë jam krenar për këtë, dhe ndihem keq që nuk kem buxhet me të madh se kemi numër më të madh që meritojnë pushim 5 ditor”
Të gjithë anëtarët e SBASHK-ut në çdo muaj paguajnë nga 5 euro anëtarësinë.
