Sindikata e Bashkuar e Arsimit, Shkencës dhe Kulturës vlerëson se reshjet e shumta të shiut dhe përmbytjet e ditëve të fundit kanë krijuar rrezik serioz për sigurinë në shumë shkolla dhe për familjet e punëtorëve të arsimit. Ata kanë paralajmëruar se nuk do të lejojnë kthimin në procesin mësimor pa u garantuar kushte të sigurta pune e mësimi.
Kjo situatë, siç thonë ata, ka dëshmuar edhe një herë se infrastruktura shkollore mbetet e pambrojtur dhe se reagimi institucional shpesh vjen vetëm pas presionit dhe shqetësimit publik.
Kjo sindikatë ka përkrahur vendimet e disa Drejtorive Komunale të Arsimit, si dhe vendimin e MASHTI-t për shtyrjen e fillimit të gjysmëvjetorit të dytë deri më 12 janar, duke vlerësuar se siguria e nxënësve dhe punëtorëve të arsimit duhet të jetë mbi çdo interes tjetër.
Megjithatë, thonë se, shtyrja e mësimit nuk është e mjaftueshme nëse nuk shoqërohet me veprime konkrete.
“SBASHK kërkon që urgjentisht: Inspektime të menjëhershme dhe të detajuara në të gjitha shkollat; Vlerësim real të gjendjes së objekteve shkollore; Sanim të menjëhershëm të dëmeve dhe eliminim të çdo rreziku për nxënësit dhe mësimdhënësit; Transparencë dhe përgjegjësi institucionale”, thotë SBASHK-u.
SBASHK e ka veçuar kërkesën për inspektime urgjente në komunat më të prekura nga përmbytjet, siç janë: Drenasi, Malisheva, Suhareka, Fushë Kosova, Klina, Gjakova, Dragashi dhe komunat e tjera ku janë raportuar dëme serioze.
Kjo sindikatë ka paralajmëruar se nuk do të lejojnë kthimin në procesin mësimor pa u garantuar kushte të sigurta pune e mësimi.
“SBASHK nuk do të lejojë kthimin në procesin mësimor pa u garantuar kushte të sigurta pune dhe mësimi. Nëse institucionet përgjegjëse dështojnë të veprojnë me kohë dhe seriozitet, SBASHK do të ndërmarrë veprime sindikale, në mbrojtje të jetës, shëndetit dhe dinjitetit të anëtarësisë së saj. Siguria nuk negociohet. SBASHK – në mbrojtje të punëtorëve të arsimit”, thuhet në reagimin e SBASHK-ut.
Ministria e Arsimit ka marrë vendim që fillimi i gjysmëvjetorit të dytë shkollor të nisë më 12 janar. Shtyrja u bë pas situatës së krijuar nga vërshimet në disa komuna.
