Mbretëria e Bashkuar ka vendosur të mërkurën sanksione ndaj një rrjeti të krimit të organizuar në Kosovë, të njohur si “Rrjeti Krasniqi”, i cili akuzohet për falsifikim masiv të dokumenteve për llogari të bandave kriminale ndërkombëtare.
Sipas njoftimit zyrtar të publikuar në faqen e qeverisë britanike, ky rrjet ka udhëhequr një laborator të sofistikuar për prodhimin e dokumenteve të falsifikuara, përfshirë pasaporta, letërnjoftime dhe patentë-shoferë nga më shumë se 50 shtete – përfshirë edhe ato të Mbretërisë së Bashkuar.
“Këto sanksione janë pjesë e Regjimit Global të Sanksioneve kundër Migracionit të Parregullt dhe synojnë të godasin rrjetet kriminale që operojnë në Ballkanin Perëndimor dhe që mundësojnë migrimin e paligjshëm drejt Mbretërisë së Bashkuar,” thuhet në deklaratën britanike.
Menjëherë pas publikimit të këtij vendimi, ka reaguar edhe Prokuroria Speciale e Republikës së Kosovës, e cila e ka mirëpritur vendimin dhe ka konfirmuar se rasti është duke u trajtuar me prioritet.
“Prokuroria Speciale e Kosovës mirëpret vendimin e autoriteteve të Mbretërisë së Bashkuar, në kuadër të Regjimit Global të Sanksioneve kundër Migracionit të Parregullt, i cili synon të luftojë rrjetet e krimit të organizuar të imigracionit që operojnë në Ballkanin Perëndimor. Rasti është duke u trajtuar me prioritet nga Prokuroria Speciale,” thuhet në reagim.
“Prokuroria Speciale do të vazhdojë të bashkëpunojë ngushtë me Mbretërinë e Bashkuar dhe me të gjitha vendet partnere, duke mbetur një aktore konstruktive dhe e besueshme në luftën e përbashkët kundër krimit të organizuar, si dhe në promovimin e sigurisë dhe drejtësisë në rajon dhe më gjerë,” përfundon komunikata.
Sipas listës së publikuar nga autoritetet britanike, personat e sanksionuar përfshijnë udhëheqës dhe anëtarë të “Rrjetit Krasniqi”:
Burim Krasniqi – udhëheqës i rrjetit
Arif Krasniqi – ndërmjetës që siguronte klientë
Flamur Krasniqi – i gjetur në posedim të dokumenteve të falsifikuara
Valon Krasniqi – i përfshirë në prodhimin e dokumenteve
Sami Duriqi – i përfshirë në prodhimin e dokumenteve
Granit Avdyli – përfshirë në prodhim dhe reklamim të shërbimeve
Nexhmije Selmani – ka siguruar ambiente dhe pajisje për falsifikim
Endrit Ermellahu – i përfshirë në prodhimin e dokumenteve
Shkëmbim Ermellahu – i gjetur në posedim të dokumenteve të falsifikuara
Këta individë janë tani të ndaluar të udhëtojnë drejt Mbretërisë së Bashkuar dhe janë përjashtuar nga qasja në sistemin financiar britanik.
Vendimi vjen në kuadër të përpjekjeve të Qeverisë së Mbretërisë së Bashkuar për të goditur rrjetet që shfrytëzojnë rrugë kyçe tranziti në Ballkan për të mundësuar migrim të paligjshëm dhe veprimtari kriminale.
