Presidenti i Francës Emmanuel Macron i bëri sot thirrje komunitetit ndërkombëtar që të forcojë parimin themelor të Kartës së OKB-së për të drejtën ndërkombëtare.
“Askush në këtë dhomë nuk është në luftë kundër Rusisë, por të gjithë duan një paqe të qëndrueshme, që do të thotë një paqe që respekton rregullin ndërkombëtar dhe rivendos Ukrainën në sovranitetin e saj”, tha Macron në samitin dyditor të paqes për Ukrainën në Burgenstock të Lucernit në Zvicër.
“Ne duhet të forcojmë parimin themelor të Kartës së OKB-së mbi të drejtën ndërkombëtare në mënyrë që të respektojmë kufijtë dhe sovranitetin”, tha ai, duke kritikuar Rusinë se është një fuqi revizioniste.
Ai e konsideroi samitin në Zvicër si një “gur historik” për të riafirmuar lidhjen me “parimet thelbësore të ligjeve ndërkombëtare”. Presidenti francez kritikoi gjithashtu Rusinë për shënjestrimin e objektivave dhe infrastrukturës civile, të cilat ai i përshkroi si krime lufte.
Presidenti i Këshillit të BE-së Charles Michel tha se e drejta ndërkombëtare dhe Karta e OKB-së duhet të jenë shtylla kurrizore për paqen e drejtë në Ukrainë. Ai tha se është detyrë kolektive e komunitetit ndërkombëtar që të mbrojë një botë të bazuar në ligje. Michel tha gjithashtu se nuk ka vend për standarde të dyfishta.
“E drejta ndërkombëtare duhet të mbrohet gjithmonë dhe kudo qoftë në Ukrainë apo në Lindjen e Mesme. Kjo është përgjegjësia jonë globale,” shtoi ai. /AA
