Nënkryetari i Skenderajt, Sami Lushtaku ka reaguar pas intervistimit të djeshëm nga Gjykata Speciale në zyrat e EULEX-it në Fushë Kosovë.
Lushtaku ka falënderuar të gjithë personat që kanë shprehur interesim dhe mbështetje pas intervistimit të djeshëm.
Ai me tej, ka thënë se gjatë gjithë jetës është munduar që të punoj më nder dhe duke pasur në rend të parë interesin e vendit dhe të qytetarëve.
“Të dashur qytetarë, Dëshiroj të ju falënderoj përzemërsisht për interesimin dhe mbështetjen e madhe pas zhvillimeve të ditës së djeshme, të cilat kanë mundur të shkaktojnë shqetësime tek secili prej jush.
Gjatë gjithë jetës sime jam munduar të punoj me nder, duke pasur në rend të parë interesin e vendit dhe popullit tim. Jam krenar për gjithçka çfarë kam bërë për vendin tim, liria e të cilit erdhi pas luftës dhe sakrificës së mijëra dëshmorëve e martirëve të cilët ranë gjatë luftës sonë çlirimtare të vitit 1998-1999. Në kërkim të Drejtësisë Tranzicionale në Kosovë, ne shqiptarët kemi paguar çmim të lartë. Drejtësisë nuk i kemi ikur asnjëherë sepse lufta jonë ishte luftë për liri, barazi e demokraci. Kjo është e vërteta jonë! Jam mirënjohës përjetësisht ndaj secilit prej jush e kështu do të jemi bashkë gjithmonë”, ka thënë ai.
Ndryshe, ish-komandanti i Ushtrisë Çlirimtare të Kosovës, Sami Lushtaku, është ndaluar nga policia e Gjykatës Speciale të premten në mbrëmje.
Kujtojmë se ditë më parë Gjykata Speciale ka bastisur shtëpinë e ish-eprorit të Ushtrisë Çlirimtare të Kosovës, Sylejman Selimi.
Lidhur me këtë Artan Qerkini, avokat i Selimit, tha se bastisja u krye nën dyshimin se ka prova për pengim të administrimit të drejtësisë, porse klienti i tij nuk është i dyshuar.
Avokati Qerkini u ankua për shkelje të të drejtave kushtetuese të Selimit. Ndërkaq, ai paralajmëroi ankesë për urdhrin e Gjykatës. /teve1.info/
