I ftuar në emisionin “ResPublika” në Tëvë1, profesor Salihu foli për luftën, gjenocidin dhe çështjet e tjera që lidhen me drejtësinë duke theksuar se krimi i gjenocidit bëhet me qëllim të zhdukjes apo asgjësimit të një pjese të një grupi etnik, nacional , fetar apo racor.
“Krimi i gjenocidit është krimi më i rëndë, më makabër më bestial që mund të kryhet gjatë luftës. Janë pesë lloje, pesë veprime të cilat e sajojnë krimin e gjenocidit, vrasjet, torturat, si formë tjetër është kur e vënë një grup etnik nacional në kushte të pa përballueshme për të jetuar. Por është interesant edhe si krim i gjenocidit konsiderohet edhe bërja e pamundur e lindjes brenda grupit nacional, etnik, racor etj. Dhe për t’u konsideruar krim i gjenocidit duhet që këto veprime që i përmenda, të kryhen me qëllim të zhdukjes, të asgjësimit të tërësishëm apo një pjese të atij grupi etnik, nacional, fetar, racor etj”, tha ai.
Tutje Salihu gjatë intervistës në Tëvë1 pohoi se veprimet që janë kryer në Kosovë nga forcat serbe i kanë shumicën e llojeve të veprimeve apo elementeve të lartpërmendura të cilat sipas tij e sajojnë nocionin dhe figurën e krimit të gjenocidit.
I pyetur se a mundet Kosova bindshëm ta argumentojë atë që ka ndodhur gjatë luftës në Kosovë, Salihu tha se duhet të mblidhen provat të cilat e faktojnë, të cilat tregojnë së është kryer krimi i gjenocidit.
“Për ta paditur Kosova Serbinë për krime të gjenocidit duhet punë shumë më e madhe se që është bërë deri më tani, duhet së paku dy tri vitet e ardhshme të mblidhen të gjitha krimet dhe në kuadrin e atyre krimeve të bëhet një rubrikë e posaçme e krimeve të gjenocidit në bazë të provave dhe mandej të ngritet edhe akuza. Kosova e ka problem të ngrisë padi pasi që nuk është anëtare e OKB-së por nuk e ka të pamundur pasi që mundet ta bëjë edhe përmes një shteti tjetër, në këtë rast Shqipëria mund ta bëjë padinë për Kosovën”, tha Salihu.
