Shenja për ndalimin e punimeve, u vendos të martën.
Kjo pasi Inspektorati i Trashëgimisë Kulturore ndali punimet e nisura nga Komuna e Prishtinës në sheshin “Xhorxh Bush”.
Mirëpo të mërkurën, kryetari Përparim Rama njoftoi se punimet në këtë zonë të kryeqytetit kanë filluar sërish.
Në një përgjigje për tëvë1, nga niveli lokal thonë se është vërtetuar se nuk ka të bëjë me punime në zonën mbrojtëse të Qendrës Historike të Prishtinës.
Madje në përgjigje pati akuza edhe ndaj zyrtarëve që kanë marrë këtë vendim.
“Ne nuk mund e as nuk duhet të ndalemi për disa çështje që janë të pastra në kuptimin e kryerjes së obligimeve që kemi ndaj qytetarëve te Kryeqytetit, sepse interpretimin e ligjit sipas tekeve të zyrtarëve të caktuar nuk duhet ta kthejmë në normë sjelljeje e veprimi zyrtar e as të frikësohemi se po bëjmë diçka të dëmshme. Ne po ua kthejmë në shërbim e shfrytëzim qytetarëve atë pjesë dhe atë shesh, një projekt që është paraparë që nga viti 2012”, ka thënë Donat Lushaku, zëdhënës i komunës
Por Drejtori i Inspektoratit për Trashëgimi Kulturore, Imer Hakaj thotë se Komuna ka zhvilluar punime në zonën e mbrojtur.
“Komuna e Prishtinës si shkak i përgjegjësisë brenda afateve ligjore ka pranuar kërkesë nga Instituti i Mbrojtjes së Monumenteve të Kosovës si institucion përgjegjës për shqyrtimin dhe vlerësimin e kërkesave dhe duhet, obligohet mi bë plotësimet e nevojshme sipas projektit të dorëzuar nga ky Komision me të cilët janë dakorduar”, shprehet Hakaj.
Madje ai tregon se janë të obliguar që ta mbrojnë këtë zonë historike të kryeqytetit.
“Inspektorati deri në shqyrtimin e dosjes së plotë nga ky institucion sipas kërkesës së Komunës obligohet në çdo ditë kur preket zona e mbrojtur të veprojë përkundër faktit të sulmeve të njëpasnjëshme dhe këtyre paraqitjeve që po i kemi. Për besën e zotit deri më tani jemi të lodhur, Inspektorati do të përgjigjet në çdo kohë, çdo moment për çdo veprim të tejkalimeve zyrtare”, thotë Hakaj.
Kryetari Rama kishte akuzuar vazhdimisht nivelin qendror për bllokimin sipas tij të projekteve madhore, për inate politike.
