Sadiku vlerësoi se mesazhi i Kurtit ishte i qartë, pasi siç tha ai, synim i tij ishte rendi dhe qetësia në veri të vendit.
“Ishte mesazh i qartë, mendoj që Qeveria i di hallet tona, Qeveria deshi që nga dora e parë të dëgjojë cilat janë brengat e hallet tona dhe Qeveria na premtoi që nga dora e parë do përkujdeset për rend, qetësi e për të gjitha telashet të cilat gjatë këtyre proceseve, gjatë kësaj bllokade e dorëheqjeve, të mos afektojë shumë në jetën e qytetarëve të rëndomtë”, deklaroi Sadiku në emisionin “Ditari”.
Më tej, ai tha se gjatë këtij takimi morën edhe një garanci se dora e shtetit do jetë e shtrirë në krah të të gjithë qytetarëve, e kjo pa dallim të përkatësisë etnike apo fetare.
Ndërkaq, i pyetur se a është përmendur mundësia për të mbajtur takime tjera pos këtij të fundit, Sadiku u shpreh se tanimë dyert i kanë të hapura të Qeveria Kurti.
“Po, dyert na u hapën, kushtimisht nuk i kemi pasur kurrë të mbyllura, por tani akoma më shumë kemi vullnet. Ishte edhe një mesazh për qytetarët e komunitetit serb që Qeveria do jetë pranë tyre dhe do mundohet që me të gjitha kapacitetet e saja ta tejkalojë edhe këtë situatë”, theksoi ai tutje.
Njëherit, Sadiku pretendoi se tanimë edhe shumica serbe janë vetëdisuar, pasi sipas tij, ata veçse kanë filluar të kërkojnë normalitet, raporton teve1.info.
“Por, e mira në të gjithë këtë është që nuk ka asnjë parashikim që mund të ketë tensione”, tha ai tutje./Tëvë1.info./
