I ftuar në emisionin “Ditari”, në Tëvë1, Sadiku potencoi se zgjedhja e Macron për President i Francës do të ketë ndikim pozitiv për Kosovën.
“Unë jam i bindur që pas rilegjitimimit të presidentit francez dhe atij serb, si të themi ribalancim i skenës politike në përgjithësi në Evropë dhe në botë do të nënkuptoj për Kosovën që do të kemi rënie të qeverise nëse nuk ka progres në dialog. Sikurse që kanë rënë më parë tri apo katër qeveritë e kaluara do të bie edhe qeveria Kurti nëse nuk ka progres dhe rezultat konkret në vazhdimin e dialogut, në vazhdimin e negociatave me Serbinë për zbatimin e një modaliteti të Asociacioni të Komunave me shumicë Serbe, i cili ndoshta nuk do të jetë krejt një Asociacion i cili do të ketë kompetenca ekzekutive, por as nuk do të jetë Asociacion i tipi OJQ. Sepse për një asociacion të tillë nuk do të kishte nevojë për negociata dhe bisedime nga viti 2011 në Bruksel deri në vitin 2022”, tha Sadiku.
Ai më tej shtoi se qeveria Kurti e ka të vështirë të bëjë hapa konkret sa i përket Asociacionit të Komunave me shumicë serbe pasi që VV-ja më parë ka qenë kundër këtij asociacioni.
“Asociacioni i Komunave me shumicë serbe do të jetë ajo “thembra e Akilit” për qeverinë Kurti pasi që e dimë që e gjithë retorika e Kurti dhe e Lëvizjes Vetëvendosje e cila ka qenë në opozitë më parë ka qenë kundër këtij asociacioni dhe nëse këta ofrojnë një asociacion i cili do të jetë kundër dialogut dhe gjërave të tjera, prandaj për këta është e vështirë të heqin dorë nga retorika e kaluar dhe të vazhdojnë më tej me politika të përshtatshme që zgjidhin problemet dhe janë ndaj Bashkësisë Ndërkombëtare”, theksoi Sadiku sonte në Tëvë1.
