Këmba e njeriut më të fuqishëm ushtarak në botë shkeli në martën në kryeqytetin kosovar.
Shefi i aleancës veri-atlantike, Mark Rutte u prit me nderimet më të larta shtetërore në Presidencë.
Sekretari i përgjithshëm i NATO-s, gjatë takimit me presidenten Osmani siguroi se kontingjenti i trupave evropiane në misionin e KFOR-it nuk do të lëvizë nga republika.
“Jemi të gatshëm t’i përgjigjemi çfarëdo zhvillimi të sigurisë. Dhe në këtë kuptim shpresojmë të shohim bashkëpunim edhe më të thellë në mes të institucioneve të Kosovës dhe KFOR-it. NATO-ja do të vazhdojë të luajë rolin e vet në mandatin e vet për sigurinë e të gjithëve”.
Kurse e para e shtetit, Vjosa Osmani, në prani të Ruttes e bëri të qartë se synimi strategjik i Kosovës është anëtarësimi në NATO.
“Synimi ynë strategjik për anëtarësim në NATO nuk është thjeshtë një interes shtetëror i yni, por edhe një domosdoshmëri strategjike për paqen në rajon dhe gjithë kontinentin evropian. Ne duam që të thellojmë partneritetin tonë me NATO-n duke zhvilluar çdo ditë e më shumë ushtrinë tonë, Forcën e Sigurisë së Kosovës, në një forcë bashkëkohore, profesionale dhe ndërvepruese me forcat partnere në shërbim të paqes, stabilitetit dhe sigurisë kudo në botë”, ka deklaruar Osmani.
Në këtë konferencë për medie u fol edhe për dialogun me Serbinë.
Rutte qartazi tha se për të ecur përpara palët duhet të jenë të gatshme për kompromise në kuadër të bisedimeve.
“NATO-ja do të vazhdojë të mbështesë plotësisht normalizimin e marrëdhënieve midis Beogradit dhe Prishtinës, udhëhequr nga BE-ja. Për ta shtyrë përpara këtë dialog, të dyja palët duhet të shfaqin fleksibilitet, të bëjnë kompromise të duhura dhe të fokusohen në dobitë afatgjate. E kuptoj plotësisht që kjo kërkon vendime të vështira, por duhet të shohim pamje më të gjerë”, tha Rutte.
Ndërkaq Osmani akuzoi Serbinë se po vazhdon të minojë përpjekjet për paqe në rajonin e Ballkanit Perëndimor.
“Jemi të vetëdijshëm për sfidat dhe kërcënimet për sigurinë e Kosovës dhe rajonit. Serbia fatkeqësisht vazhdon të minojë përpjekjet për paqe dhe stabilitet dhe përmes veprimeve hibride, grupeve kriminale dhe propagandës së vazhdueshme e mbështetur edhe nga Rusia. Beogradi po synon të destabilizoj jo vetëm Kosovën por edhe rajonin”.
Pas konferencës me Osmani, Rutte zhvilloi takim edhe me kryeministrin e vendit, Albin Kurti.
