Sekretari i Përgjithshëm i NATO-s Mark Rutte iu drejtua sot gazetarëve në Bruksel.
Nga këta të fundit ai u pyet edhe për marrëveshjen tripalëshe për mbrojtje ndërmjet Kosovës, Shqipërisë dhe Kroacisë, çështje për të cilën Rutte refuzoi të komentonte.
Megjithatë shefi i NATO-s tha se situatën në Kosovë është duke e përcjellë nga afër, teksa tha se e ka folur edhe me presidentin serb Aleksander Vuciq se serbët duhet të punojnë për të sjellë para drejtësisë përgjegjësit e sulmit të Banjskes.
“Por ju lutem kuptoni që, si sekretar i përgjithshëm, duhet të përmbahem që të mos komentoj mbi çdo zhvillim në çdo pjesë të botës, përfshirë Ballkanin Perëndimor. Situatën e sigurisë në Kosovë e përcjellim nga afër dhe duhet të sigurohemi se situata që nga 1999 që është shumë më stabile tani, të vazhdojë. Sa i përket Banjskës dhe sulmit ndaj trupave të KFOR-it, serbët duhet të punojnë për përgjegjësi. E kemi folur këtë me Vuçiqin në telefon por edhe kur drekuam në Bruksel dy javë më parë”, ka thënë Rutte.
Rutte ndër të tjera theksoi se stabiliteti dhe situata në Ballkanin Perëndimor janë një preokupim i madh për aleancën ushtarake, teksa përmendi edhe praninë e trupave të NATO-s në Kosovë dhe në Bosnjë e Hercegovinë. /Tëvë1/
