Sekretari i Përgjithshëm i NATO-s, Mark Rutte, ka lavdëruar komandën turke të misionit KFOR në Kosovë, duke thënë se kontributi i këtyre trupave është kyç në ruajtjen e sigurisë në Kosovë.
Ai këtë e ka thënë në një takim që ka zhvilluar me presidentin turk Recep Tayyip Erdogan gjatë vizitës të hënën në Turqi.
“Rutte po ashtu e uroi Turqinë për përmbylljen e suksesshme të komandës së misionit paqeruajtës të NATO-s në Kosovë, KFOR, duke thënë se ‘kontributi juaj i vazhdueshëm me trupa është kyç në ruajtjen e ambientit të sigurt për të gjithë në Kosovë”, thuhet në komunikatën e NATO-s.
Rutte ka lavdëruar Turqinë për kontributin në Aleancën veriatlantike duke theksuar se Turqia ka ushtrinë e dytë më të madhe në NATO dhe shpenzon më shumë se dy për qind të bruto prodhimit të brendshëm në mbrojtje.
Të dy kanë folur edhe për luftën në Ukrainë. Rutte ka lavdëruar Turqinë për përkrahjen e Ukrainës me municion, artileri dhe ndihma të tjera teksa ka thënë se luan rol kyç edhe në Marrëveshjet për Grurin dhe përpjekje tjera diplomatike.
Turqia ka udhëhequr trupat e KFOR-it në Kosovë për një vit. Ozkan Ulutash kishte marrë detyrën si komandant i KFOR-it në tetor të vitit të kaluar.
