Sekretari i Përgjithshëm i NATO-s, Mark Rutte, pas takimit me presidenten e Kosovës, Vjosa Osmani është deklaruar për media.
Rutte ka deklaruar zotim nga NATO-ja që është e përkushtuar për stabilitet e paqe në Kosovë, si dhe për një rajon të qëndrueshëm.
“Prania këtu sot është një demonstrim krejt i qartë i përkushtimit të palëkundur të NATO-s për siguri afatgjate në Kosovë dhe pastaj për stabilitetin e rajonit. Sapo patëm një diskutim të frytshëm sa i përket gjendjes së sigurisë këtu në Kosovë si dhe në rajon. NATO-ja ka mbështetur paqen e stabilitetin në Ballkanin Perendëimor, por tashmë e 30 vjet më radhë. Përkushtimi i NATO-s mbetet i qëndrueshëm edhe sot i udhëhequr nga KFOR-i, që është misioni më afatgjatë dhe më i madh në lidershqip e shkëlqyeshëm nga gjenerali Enrico Borduani. Trupat tanë të KFOR-it punojnë pa pushim për të siguruar një ambient me rend e siguri për të gjithë popullin e pakicat që jetojnë në Kosovë me përputhje me mandatin e OKB-së për KFOR-it”, tha Rutte.
Ai deklaroi se NATO-ja është gati për t’iu përgjigjur çfarëdo zhvillimi të sigurisë. Ndërkohë, shpreson që bashkëpunimi mes institucioneve të Kosovës dhe KFOR-it të jetë edhe më i thellë.
“Jemi gati për t’iu përgjigjur çfarëdo zhvillimi të sigurisë, dhe në këtë kuptim shpresojmë të shohim një bashkëpunim edhe më të thellë midis institucioneve të Kosovës dhe KFOR-it në këtë drejtim. NATO-ja do të vazhdojë të luajë rolin e vetë, në mandatin e vetë”.
Ndërkaq, sekretari i Përgjithshëm i NATO-s, foli edhe për dialogun mes Kosovës e Serbisë.
Ai tha se zgjidhja e vetme për t’i zgjidhur çështjet e pazgjidhura është politika, derisa theksoi se për ta çuar përpara dialogun duhet që të dyja palët të bëjnë kompromise si dhe të fokusohen në dobitë afatgjate.
“Stabiliteti në rajon varet nga të gjitha palët. Zgjidhja për një afat të gjatë është politika, në këtë drejtim NATO-ja do të vazhdojë të mbështesë plotësisht normalizimin e marrëdhënieve midis Beogradit dhe Prishtinës, të udhëhequr nga BE. Kjo është e vetmja zgjidhje për t’i zgjidhur çështjet e pazgjidhura dhe për të siguruar të ardhme dhe stabilitet, duke siguruar të drejtat e të gjitha komuniteteve. Për ta çuar përpara këtë dialog të dyja palët duhet të shfaqin fleksibilitet, të bëjnë kompromis të duhur, dhe të fokusojnë në dobitë afatgjate. E kuptoj plotësisht që këto duhen vendime të vështira, por që do të duhet ta shohim atë pamje më të gjerë”, deklaroi ai./teve1.info/
