Autoritetet ruse kanë shpallur gjendje të jashtëzakonshme në ishujt Kuril, pasi valët e cunamit, të shkaktuara nga një tërmet me magnitudë 8.8, goditën zonën, duke përmbytur portin e peshkimit në Severokurilsk dhe ndërprerë furnizimin me energji elektrike.
Kryetari i bashkisë, Alexander Ovsyannikov, konfirmoi se katër valë cunami, deri në 3 metra të larta, përmbytën anijet në port, por nuk pati dëme të mëdha në qytet, transmeton AP.
Në gadishullin Kamchatka, disa persona u plagosën duke u përpjekur të largoheshin nga ndërtesat. Një video nga një spital në Kamchatka tregoi mjekët që vijuan një operacion pavarësisht lëkundjeve.
Qyteti rus Petropavlovsk-Kamchatsky ka shpallur gjendje të jashtëzakonshme, pasi tërmeti u ndje fuqishëm në të gjithë rajonin.
Kryebashkiaku Yevgeny Belyaev njoftoi në një postim në rrjetet sociale se të gjitha shërbimet janë vënë në gatishmëri të lartë, duke shtuar se autoritetet janë duke ndjekur nga afër zhvillimet për çdo rrezik të mundshëm.
Tërmeti, një nga katër më të fuqishmit e shekullit dhe ndër tetë më të fortët që nga viti 1900, ndodhi përgjatë Unazës së Zjarrit të Paqësorit, zonë e njohur për aktivitet të lartë sizmik.
