Kryetarja e Këshillit të Helsinkit për të Drejtat e Njeriut në Serbi, Sonja Biserko thotë se Kosova rrezikon të bosnjëzohet nëse formohet Asociacioni i Komunave me Shumicë serbe në baza etnike.
Çdo takim të nivelit të lartë në Bruksel e përcjell me shumë vëmendje.
Kryetarja e Këshillit të Helsinkit për të Drejta e Njeriut në Serbi, Sonja Biserko ka një drojë për këto negociata, pasi ajo thotë se në rast se Kosova vendos për themelimin e Asociacionit të komunave me shumicë serbe, rrezikon të bosnjëzohet.
Madje Biserko thekson se nuk ka kurrfarë garancie që Serbia do t’i respektoje marrëveshjet e tjera edhe në rast se Kosova fillon me zbatimin e marrëveshjes për Asociacionin.
Sipas saj, presidenti i Serbisë, Aleksandar Vuçiq nuk e ka për synim normalizimin e raporteve me Kosovën.
“Dialogu nuk mund të ketë sukses derisa Serbia është e interesuar ta mbaj status-quo dhe ta zgjas sa më shumë këtë proces. Natyrisht që Kosova nuk mund ta trajtoj si prioritet të parë themelimin e asociacionit me baza etnike, kur nuk ka garanci se Serbia do t’i respektoj marrëveshjet e tjera për normalizimin e marrëdhënieve. E kuptoj plotësisht frikën që ka Kosova nga krijimi i Asociacionit të komunave me shumicë serbe sepse rrezikon të bosnjëzohet, dhe ky është qëllimi kryesor i presidentit të Serbisë, Aleksandar Vuçiq”.
Aktivistja për të drejtat e njeriut vlerëson se dialogu nuk mund të ketë sukses nëse vetëm njërës palë i bëhet presion.
Ajo ka treguar edhe arsyet që sipas saj po e shtynë Perëndimin ta trajtoj më butë Serbinë.
“Serbia po trajtohet më butë sepse Perëndimi po synon që ta largojë përfundimisht nga ndikimi i madh i Rusisë. Influenca e Rusisë nuk paraqet rrezik vetëm për Kosovën po për të gjitha shtetet e Ballkanit Perëndimor. Vetëm shikojini veprimet e Vuçiqit, ai asnjëherë nuk do të rreshtohet me Perëndimin duke i vënë sanksione Rusisë. Perëndimi po mendon se vetëm duke i bërë presion Kurtit do të arrijnë diçka me dialog, dhe këtu mendoj se e kanë gabim sepse kjo qasje vetëm sa do t’i komplikoj edhe më shumë gjërat në të ardhmen”.
I pakënaqur me procesin e dialogut është shprehur edhe kryeministri i vendit, Albin Kurti.
Ky i fundit akuzoi emisarin evropian, Miroslav Lajçak, se po mban anën e Serbisë në dialog me Kosovën.
