Rusia ka ndërmarrë sulmin më intensiv ajror me dronë ndaj Ukrainës që nga fillimi i pushtimit në shkallë të plotë në vitin 2022, duke shënuar një përshkallëzim të ndjeshëm të konfliktit në lindje të Evropës.
Sipas Forcave Ajrore të Ukrainës, gjatë natës janë lëshuar gjithsej 273 dronë sulmues dhe karrema shpërthyes, nga të cilët 88 janë shkatërruar nga mbrojtja ajrore dhe 128 të tjerë janë neutralizuar përmes bllokimit elektronik. Sulmet ajrore goditën kryesisht rajonet e Kievit, Dnipropetrovskut dhe Donetskut.
Zyrtari i lartë i Forcave Ajrore të Ukrainës, Yuriy Ihnat, deklaroi për agjencinë Associated Press se ky ishte sulmi më i madh me dronë nga Rusia që nga fillimi i luftës së saj në shkallë të gjerë. Ai tha se përmasat e kësaj goditjeje e tejkalojnë edhe sulmin e mëparshëm më të madh, i cili ndodhi në prag të përvjetorit të tretë të luftës, kur Rusia përdori 267 dronë.
Në rajonin e Kievit, një grua 28-vjeçare humbi jetën, ndërsa tre persona të tjerë, përfshirë një fëmijë 4-vjeçar, u plagosën nga një prej dronëve të rënë, sipas guvernatorit lokal Mykola Kalashnyk, ka raportuar AP.
Nga ana tjetër, Ministria e Mbrojtjes e Rusisë raportoi se mbrojtja ajrore ruse rrëzoi 25 dronë ukrainas gjatë të njëjtës periudhë — shtatë gjatë natës dhe 18 të dielën në mëngjes.
Sulmet vijnë në një moment kur bisedimet e para të drejtpërdrejta mes Moskës dhe Kievit, të zhvilluara të premten, nuk arritën të prodhojnë një armëpushim.
Ndërkohë, Presidenti amerikan Donald Trump njoftoi se të hënën do të zhvillojë biseda telefonike me Putinin dhe Zelenskyn, si dhe me liderët e NATO-s, në përpjekje për të ndihmuar në përfundimin e konfliktit.
