Rusia nisi afro 500 dronë drejt Ukrainës në atë që u konsiderua si sulmi më i madh ajror me dronë gjatë gjithë luftës 3-vjeçare, sipas forcave ajrore ukrainase të hënën.
Sipas ushtrisë ajrore ukrainase, përveç 479 dronëve, forcat ruse lëshuan edhe 20 raketa të llojeve të ndryshme drejt rajoneve të ndryshme, kryesisht në zonat qendrore dhe perëndimore të vendit.
Ukraina raportoi se sistemi i saj i mbrojtjes ajrore shkatërroi 277 dronë dhe 19 raketa, ndërsa vetëm rreth 10 dronë apo raketa arritën të godasin objektivat e tyre. Një person u raportua i plagosur. Këto të dhëna nuk janë verifikuar në mënyrë të pavarur.
Ky përshkallëzim i sulmeve ajrore vjen paralelisht me një shtim të sulmeve tokësore nga Rusia në lindje dhe verilindje përgjatë një vije fronti prej rreth 1,000 kilometrash.
Presidenti ukrainas Volodymyr Zelenskyy e përshkroi situatën në disa prej këtyre zonave si “shumë të vështirë”, pa dhënë më shumë hollësi.
Ndërkohë, Ukraina përballet me sfida të mëdha në vijën e frontit dhe varet nga mbështetja ushtarake perëndimore, veçanërisht për sa i përket mbrojtjes ajrore. Megjithatë, pasiguritë rreth politikës së SHBA-së ndaj luftës kanë ngritur pikëpyetje mbi vazhdimësinë e kësaj ndihme.
Pavarësisht vështirësive, Ukraina ka realizuar disa kundërsulme të suksesshme. Një prej tyre ishte një sulm i sofistikuar me dronë ndaj bazave ajrore ruse të vendosura thellë brenda territorit të Rusisë, sipas raportimeve të AP.
Të hënën, Shtabi i Përgjithshëm ukrainas njoftoi se forcat speciale kishin goditur dy avionë luftarakë rusë në aeroportin Savasleyka, në rajonin Nizhny Novgorod – rreth 650 kilometra nga kufiri ukrainas. Nuk u dhanë detaje mbi mënyrën e sulmit, ndërsa autoritetet ruse nuk kanë komentuar ende.
Zyrtarë rusë pohuan se intensifikimi i sulmeve të tyre është një përgjigje ndaj sulmeve ukrainase në bazat ajrore që strehojnë bombardues strategjikë me kapacitet bërthamor.
Ministria e Mbrojtjes e Rusisë tha se sulmi ndaj bazës ajrore ukrainase në Dubno, në rajonin perëndimor të Rivne-s, ishte pjesë e kësaj hakmarrjeje.
Bisedimet e fundit të paqes në Stamboll mes delegacioneve të të dy vendeve nuk kanë sjellë përparim përveç marrëveshjeve për shkëmbimin e të burgosurve dhe trupave të vrarë ose të plagosur rëndë.
Presidenti rus Vladimir Putin ka dhënë shenja se lufta do të vazhdojë derisa kërkesat e Rusisë të plotësohen.
