Banka Qendrore e Rusisë ka njoftuar të hënën se po kërkon një dëmshpërblim prej 230 miliardë dollarësh nga Euroclear, ndërsa Kremlini ka lëshuar një paralajmërim lidhur me përdorimin e aseteve të ngrira ruse për të ndihmuar Ukrainën.
Udhëheqësit e Bashkimit Evropian pritet të vendosin më vonë këtë javë nëse do të përdorin 210 miliardë euro nga asetet e ngrira ruse për t’i dhënë Ukrainës një kredi me qëllim financimin e mbrojtjes dhe mbajtjen e ekonomisë në funksion.
Shumica e këtyre aseteve, 185 miliardë euro ruhen në depozitën qendrore të letrave me vlerë Euroclear në Bruksel, e cila është mbajtësja kryesore e shumicës së pasurive të palëvizshme të Kremlinit.
Zyrtarët e BE-së kanë argumentuar se plani është ligjërisht i qëndrueshëm, duke theksuar se Rusia mbetet pronare e pasurisë së saj sovrane, e cila u ngrinë në juridiksionet evropiane disa ditë pas pushtimit në shkallë të plotë të Ukrainës në vitin 2022.
Megjithatë, Moska ka deklaruar se përdorimi i këtyre aseteve përbën vjedhje dhe ka kërcënuar se do të sekuestrojë pronat e investitorëve privatë evropianë në Rusi, raporton Guardian.
Kirill Dmitriev, kreu i Fondit Sovran të Pasurisë së Rusisë dhe një figurë kyçe në bisedimet e paqes, shkroi në X se Rusia “do të fitojë në gjykatë” dhe “do t’i marrë mbrapsht [asetet]”, duke shtuar se Bashkimi Evropian, monedha euro dhe Euroclear “do të vuajnë” nga ky plan.
Në një përpjekje të dukshme për të krijuar një përçarje midis Evropës dhe Shteteve të Bashkuara, Dmitriev e përshkroi planin e aseteve si “një sulm të egër ndaj të drejtave të pronës dhe sistemit të rezervave ndërkombëtare të krijuar nga Shtetet e Bashkuara”.
Euroclear nuk ka pranuar të komentojë në lidhje me këtë por, më herët, kompania kishte deklaruar se po përballet me më shumë se 100 padi në Rusi.
