Nën pranga u soll të premten para gjykatës Nenad Orlloviq, i akuzuar për sulm ndaj KFOR-it në Zveçan të vitit të kaluar.
Orlloviq po ashtu akuzohet për pjesëmarrje në turmë që kryen vepër penale dhe huliganizëm.
Për këto dy vepra të cilat dyshohet se i kreu në maj të vitit të kaluar, Orlloviqii cili ndryshe njihet me nofkën Rusi, u prezantua me një nofkë tjetër.
Sipas aktakuzës së siguruar nga televizioni, Orlloviqi në koordinim me persona të tjerë, dyshohen se me mjete të forta, armë zjarri e mjete të improvizuara shpërthyese, kanë lënduar të paktën 30 pjesëtarë të forcave paqeruajtëse KFOR dhe të Policisë së Kosovës.
Për veprat që e ngarkon Prokuroria, i pandehuri Orlloviq ka kërkuar të bashkëpunojë me institucionin dhe të arrihet marrëveshje për pranimin e fajësisë.
“Këtë kërkesë e kam përsëritur prapë pas ngritjes së aktakuzës dhe kam kërkuar që të lidhet marrëveshje për pranimin e fajësisë për dy veprat penale sipas aktakuzës së PSRK-së”, tha avokati i Orlloviqit.
Kërkesa u aprovua nga gjyqtarja Valbona Musliu Selimaj.
Prokurori special Bekim Kodraliu tregoi edhe për lartësinë e dënimit të rekomanduar.
“Për veprën penale sulmi ndaj personit zyrtar kemi rekomanduar që të shqiptohet dënim me burgim prej 15 deri në 17 muaj. Kurse për veprën e dytë ti shqiptohet dënim me burgim prej 6 muajsh me mundësi shndërrimi në gjobë prej 10 deri në 12 mijë euro”, tha Kodraliu.
Edhe vet Orlloviq shprehu gatishmërinë që masa e dytë e burgimit ti shndërrohet në gjobë.
“Jap pëlqimin që dënimi me 6 muaj burgim të më zëvendësohet me dënimin me gjobë. Unë jap fjalën që nuk do ta lëshoj Kosovën, nuk kam se ku të shkoj këtu e kam familjen, punën dhe nuk dua që të largohem nga këtu. Dhe premtoj qe nuk do ta përsëris veprën penale”.
I akuzuari Nenad Orlloviq apo siç njihej ndryshe Rusi, ishte arrestuar në një autolarje në veri, pikërisht në vendin ku ka punuar.
