Rushiti në Tëvë1, foli edhe për ekspozitën e mbajtur sot kushtuar viktimave të dhunës seksuale.
Ajo tregoi momentin kur më 14 prill të vitit 2019, së bashku me zonjën Vasfije Krasniqi Goodman, kanë vizituar vendin ku ka ndodhur krimi, ku pikërisht po në atë datë kanë bërë kërkesë që ajo ditë të shënojë dhe përkujtojë të mbijetuarit e dhunës seksuale në luftë.
“Historikisht për hirë të opinionit, pikërisht në vitin 2019 më 14 prill, së bashku me zonjën Vasfije Krasniqi Goodman, kemi shkuar te vendi ku ka ndodhur krimi, vend që për të gjithë ne, e në veçanti për atë që e ka përjetuar dhe familjarët e saj kanë ngjallur emocione të veçanta, mirëpo ajo arriti ta mposhtë tërë dhimbjen, tërë psikologjinë e saj, duke shkuar në ballafaqim me vendin e krimit. Pikërisht në atë ditë, ne kemi kërkuar që kjo ditë të jetë e veçantë e cila e përkujton dhimbjen, sakrificën, vuajtjen e mijëra grave dhe burrave, të cilët padrejtësisht u dhunuan, u torturuan dhe u keqtrajtuan gjatë periudhës së luftës”, deklaroi Rushiti.
Rushiti tha se sot përsëri takuan presidenten e vendit, kryeministrin dhe kryetarin e Kuvendit, ku shfrytëzuan mundësinë të bëjnë edhe disa kërkesa tjera duke prekur këtu edhe ndryshimet ligjore.
“Në vitin e kaluar, kemi bërë një kërkesë te presidentja e vendit që kjo ditë të shënojë dhe përkujtojë të mbijetuarit e dhunës seksuale të luftës. Ne sot patëm fatin ta takojmë përsëri presidenten e vendit, kryeministrin dhe kryetarin e Kuvendit, që përveç kësaj kërkese, kishim edhe një mori kërkesash tjera të cilat kanë për qëllim avancimin e kauzës së mbijetuarve të dhunës seksuale duke prekur edhe ndryshimet ligjore”, tha ajo.
