Naser Rugova nga Lidhja Demokratike e Kosovës (LDK) ka vlerësuar se kryeministri në detyrë, Albin Kurti, ka arritur me mjeshtëri ta fusë gjithë spektrin politik opozitar në një kurth politik.
Në emisionin “Këndi i Debatit” në Tëvë1, Rugova ka theksuar se Kurti ka orkestruar me mjeshtëri lojën me Listën Serbe dhe ka përdorur taktikisht këtë situatë për të anatemuar partitë opozitare.
“I gjithë spektri politik opozitar u lajthit dhe hyri në kurthin e Albin Kurtit. Loja me Listën Serbe u orkestrua aq bukur nga Kurti dhe u zbatuan taktikisht në mënyrë të tillë që partitë opozitare u anatemuan, duke u akuzuar se kush e voton një përfaqësues nga Lista Serbe është tradhtar ose kriminel. Ka degraduar gjuha politike dhe perceptimi i publikut, ku individi shpallet tradhtar apo kriminel nga partitë e tjera. Prandaj, Kurti me mjeshtëri të madhe e futi opozitën, fatkeqësisht edhe LDK-në, një parti historike me bagazh dhe përgjegjësi politike”, ka thënë ai.
I pyetur se si ka mundësi që edhe LDK-ja, si partia më e vjetër në vend, të bjerë në një kurth të tillë, Rugova ka thënë se kjo ka ndodhur për shkak të mungesës së lidershipit dhe largpamësisë politike brenda partisë.
“Është mungesë lidershipi dhe mungesë e perceptimit për rolin dhe peshën politike e institucionale që ka LDK-ja si subjekt politik. Në këto incidente politike dhe në kurthin që ra gjithë spektri politik kam pasur dëshirë ta shoh LDK-në jo si vagon, por si lokomotivë përjetare e proceseve politike, diplomatike dhe institucionale”, është shprehur Rugova./teve1.info/
