Në një seancë dëgjimore në Kongresin amerikan, Sekretari amerikan i Shtetit, Marco Rubio, ka deklaruar se çështja e anëtarësimit të Kosovës në NATO nuk është aktualisht në agjendën e shteteve anëtare të Aleancës.
Rubio ka thënë se, megjithëse kjo nuk përjashton mundësinë e ardhshme të anëtarësimit, çështja nuk është trajtuar kohët e fundit në bisedimet mes aleatëve të NATO, pasi fokusi i tyre është i orientuar në çështje të tjera globale.
“Në përgjithësi, NATO është e përqendruar në disa çështje të tjera dhe zgjerimi, veçanërisht në rastin e Kosovës, nuk është në plan të parë të agjendës së disa shteteve,” është shprehur Rubio.
Çështja e integrimit të Kosovës në NATO u ngrit nga kongresisti Keith Self, i cili ka theksuar se anëtarësimi i Kosovës është i rëndësishëm për stabilitetin e rajonit të Ballkanit, të cilin ai e përshkroi si “shumë të brishtë”.
Self gjithashtu ka deklaruar se disa shtete anëtare të NATO-s po e bllokojnë procesin e anëtarësimit të Kosovës dhe ka përmendur tensionet e vazhdueshme mes Kosovës dhe Serbisë, duke shtuar se prania e trupave të KFOR-it mbetet thelbësore për sigurinë në rajon./teve1.info/
Kongresisti Self: Kosova në NATO, thelbësore për stabilitetin rajonal
