Adnan Rrustemi nga LVV ka deklaruar se Gjykata Speciale asnjëherë nuk është dashur të votohet e as të themelohet nga Kuvendi i Kosovës.
I ftuar në emisionin “Ditari” në Tëvë1, Rrustemi thotë se deputetët të cilët kanë votuar, lobuar dhe kanë kërkuar themelimin e Speciales, sipas tij sot do duhej të ndiheshin keq dhe të kërkojnë falje.
Ndërkohë, ai ka ftuar të gjithë shqiptarët që të kontribuojnë nëpërmjet protestave dhe veprimeve tjera për mbrojtjen e luftës së UÇK-së dhe të krijojnë përgjegjësi për ata të cilët e kanë themeluar Gjykatën Speciale.
“Mendoj që protesta e sotme, sikurse edhe protesta e mëparshme konfirmojnë një gjë që kjo Gjykatë Speciale asnjëherë nuk është dashur të themelohet, asnjëherë nuk është dashur të votohet nga Kuvendi i Kosovës, mendoj që gjithë ata që e kanë votuar, lobuar dhe kanë kërkuar themelimin e kësaj Gjykate Speciale sot duhej të ndihen keq, duhej të manifestojnë pendim dhe t’i kërkojnë falje popullit të Kosovës dhe UÇK-së, kombit shqiptar. Ftoj të gjithë shqiptarët gjithë andej që të ndihmojnë të kontribuojnë nëpërmjet protestave, veprimeve tjera në mbrojtje të luftës së drejtë të UÇK-së dhe të krijojnë përgjegjësi te ata të cilët e kanë themeluar e mbrojtur themelimin e kësaj Gjykate”, ka deklaruar Rrustemi.
Kurse, sa i përket themelimit të Qeverisë së Kosovës, ky i fundit shpreson se Gjykata Kushtetuese nuk do ta pengojë procesin për themelimin e institucioneve të Kosovës.
Rrustemi thotë se e vetmja garanci për sovranitetin e Kosovës është Qeveria Kurti 3, derisa ai shprehet i bindur se në Kuvendin e Kosovës do të votohet themelimi i Qeverisë Kurti 3.
“Besoj që Gjykata Kushtetuese nuk do të bëhet pengesë e themelimit të institucioneve dhe nuk do të bëhet pengesë aq më tepër tash kur kemi konstituimin e Kuvendit, ne duhet të ecim tutje. Unë besoj që po do të ketë qeveri Kurti 3 pas datës 26 tetor, është e domosdoshme që të ketë Qeveri Kurti 3, e vetmja garanci për sovranitetin e Kosovës për të garantuar që arritjet që janë bërë deri tani janë të qëndrueshme dhe të paprekshme. Unë besoj shumë që politikisht do të votohet në Kuvendin e Kosovës”, tha ai ndër të tjera./teve1.info/
