Kur ora shënon 18:00 e mbrëmjes.
Ekipi mblidhet dhe mbahet një takim konsultativ.
Këtu shefi i njësisë anti-kontrabandë, ndan përgjegjësitë për zyrtarët e këtij njësiti.
E gjithë kjo bëhet para nisjes së një aksioni.
Pas takimit, me vetura zyrtare dhe atë civile, zyrtarë të doganës nisën për në terren, për çka shefi i kësaj njësisë anti-kontrabandë, Bekim Shala tregon edhe planin.
“Fillimisht do të vazhdojmë me në regjonin e Vitisë, në dy rrugë në të cilat në të kaluarën ka pasur raste që kemi hasur në mall të kontrabanduar pastaj do të vazhdojmë në regjionin e Gjilanit, edhe në atë pjesë janë dy ose tri rrugë nuk ka pika kufitare por të cilat përdorën për kontrabandë”, deklaroi Shala për Tëvë1.
Pas një ore rrugëtim, me veturë civile arrijnë në rrugët alternative që qojnë në pikën kufitare me Maqedoninë, gjegjësisht në fshatin Debelde.
Nga aty, fillon vëzhgimi edhe me pajisje të natës, qetësia mbizotëron e lëvizja të dyshuara nga shteti fqinj nuk vërehen.
Por, sipas zyrtarëve të këtij njësiti, kjo pikë cilësohet si më e përdorura për kontrabandë me mallra.
Nga kjo rrugë ilegale, dyshohet se kontrabanduesit e frekuentojnë për të futur mallra ilegale në territorin e Kosovës.
“Gjendemi në afërsi të kufirit mes Republikës së Kosovës dhe Maqedonisë së veriut. Përndryshe jemi nga Drejtoria për zbatimin e ligjit pranë Doganës së Kosovës konkretisht sektori anti-kontrabandë. Gjendemi në regjionin ku aktualisht cilësohet si pikë e nxehtë dhe ku ka pas raste në të kaluarën të kontrabandimit të mallrave të ndryshme. Ka pas mallra por edhe vepra të tjera penale të cilat kanë ndodhur ku varësisht nga trajtimi i rasteve, klasifikimit të rasteve, është bërë edhe trajtimi i tyre”, thotë zyrtari i anti-kontrabandës.
Aksioni nuk përfundon me kaq.
Njësitet nisën për në rrugët ilegale në fshatin Mjak, aty ku rrugët ilegale janë shumë afër territorit që lidh Kosovën me Maqedoninë.
Kështu Dogana e Kosovës vepron për të parandaluar këtë dukuri negative.
Sipas përgjegjësit të njësisë anti-kontrabandë, falë përkushtimit, parandalimi i kontrabandës është rritur.
“Këtë rrugë tash kohëve të fundit sidomos në vitin e fundit, shfrytëzohet më së shumti për kontrabandë….. Zakonisht në këtë pjesë patrullojmë me automjete civile dhe shumicën e rasteve veprojmë në bazë të informatave të qytetarëve”, thotë Shala.
Por, për çfarë mallrash të sekuestruara bëhet fjalë në këtë zonë ?
“Tekstil , elektronikë. Komplet në këtë pjesë kufitare me Maqedoninë, ka tekstil, ka elektronikë, është malli më i shtrenjtë në krahasim me pikat tjera me brezin kufitar me shtetet tjera”, tregoi Shala.
E përveç patrullimeve në rrugë ilegale, kontrolle bëhen ndaj veturave edhe në komunikacion, në rast se ato janë të dyshuara.
Sipas Doganës së Kosovës, luftimi i kontrabandës mbetet sfidë, por siç thonë ata, tash e disa vite ka rritje të parandalimit të kësaj dukurie.
