Ishin nisur në drejtim të Kosovës.
Përmes kësaj rruge, Ejup e Cennet Ternava dhe Fatmire Shabani po ktheheshin në vendlindje nga Aeroporti i Shkupit.
Mirëpo rruga iu ndal në gjysmë.
Vetura ra disa metra poshtë kësaj rruge të papërfunduar, duke shkaktuar vdekjen e të tre familjarëve.
Trupat e të ndjerëve dyshohet se qëndruan në këtë vend për rreth 24 orë, pasi të afërm të tyre treguan se që prej 18 korrikut nuk dinin asgjë për ta.
Në kërkim të tashmë të ndjerëve, u angazhuan edhe banorë të zonës. Këtë atyre ua kërkoi policia.
Zona ku ndodhi vetaksidenti tragjik, është rreth katër kilometra larg pikës kufitare të Hanit të Elezit.
Përkundër që kjo rrugë është e papërfunduar, asaj i mungon sinjalistika ndriçuese e cila e ndalon qarkullimin në këtë zonë.
Rruga thjeshtë përfundon me një sasi të madhe të gurëve, të cilët duket se ishin vështirë të vërejtshëm për shoferin Ejup Ternava.
Gjatë ditës, ambasadori kosovar në Maqedoninë e Veriut, Florian Qehaja njoftoi se janë duke u kryer peocedurat që trupat e të ndjerëve t’i sjellin në Kosovë.
“Që nga marrja e informacionit për rastin, Ambasada e Republikës së Kosovës ka qenë në kontakt të vazhdueshëm me autoritetet kompetente të Republikës së Maqedonisë së Veriut, Ministrinë e Punëve të Brendshme dhe Policinë e Kosovës, si dhe me familjarët e të ndjerëve, për të ofruar ndihmën e nevojshme gjatë gjithë trajtimit të rastit”, ka shkruar Qehaja.
Ngushëllime për rastin kanë shprehur edhe U.D presidentja, Albulena Haxhiu, kryeministri në detyrë Albin Kurti e përfaqësues tjerë politikë.
