Gjithçka është bërë shkrumb e hi në katin e tretë të shtëpisë së familjes Rexhepi.
Mbrëmjen e së hënës rrufeja goditi shtëpinë e cila gjendet në fshatin Celinë të Rahovecit
Dhe jo vetëm në këtë kat, dëmet janë shkaktuar në të gjithë shtëpinë pasi uji për fikjen e zjarrit depërtoi gjithandej.
Pronari i shtëpisë tregoi ndodhi e tëra.
“Ka ardh prej shkarkimit të rrufesë, ka qenë goditje e madhe e rrufës me madhe qe ka mujt me goditë sipas një ekspertit që ke me herët. Ai sic me tha goditja ka qenë 1800 vat, edhe tha që fati juaj që keni pas rrufepritësin se ka mujt me qenë edhe me keq. Pak a shumë afër 40 mijë euro besoj, se ka qenë gjithçka renovim i ri. Ujë e ka demtuar komplet shtëpinë cdo plafon cdo mur është i lagur edhe e ka demtuar inventarin brenda”, ka thënë Fatos Rexhepi- pronar i shtëpisë.
Për të lokalizuar zjarrin e shkaktuar nga rrufeja, zjarrëfikësit sipas Rexhepit u vonuan rreth një orë.
“Policia janë ardhë shumë shpejt e zjarrëfikësit janë ardh tek pas një ore, me ta jemi shumë të deshpruar se ata nuk kishin as mjete, edhe gypat e shperthymë”, tha ai.
E për këtë vonesë, nga shtabi i zjarrfikëseve në Rahovec kanë arsyetim.
“Kemi pas thirrje nga ora 20:45 kemi shku me pompe, por një zjarrfikës shoferë, ka pas ndeshje gjatë rrugës ndoshta pak u vono. Gypat nuk kanë qenë të shpërthyer kemi gypa të reja, si kanë marrë informacion unë nuk e di, çdo familjar ankohet se zjarrfikësit me shku edhe për 2 minuta në vend të ngjarjes ata ankohen”, u shpreh Niki Kollari- zjarrfikës
Nga komuna e Rahovecit të martën kanë bërë edhe vlerësimin e dëmeve.
Por nga kjo komunë thonë se nuk kanë buxhet për kompensimin e dëmeve andaj presin ndihmë nga niveli qendror.
“Sot kemi qenë me komisionin komunal për vlerësim të dëmeve anëtaret e komisionit e kanë vlersuar dëmin i kanë marrë të gjitha informatat e nevojshme dhe me pastaj do të procedojnë në AME ,urojë shumë që AME do të kompensojë këtë dëm. Fatkeqësisht komuna e Rahovecit ka një buxhet shumë të vogël për kompensimin e dëmeve nga fatkeqësitë e natyrore, ne presim ndihmën e Qeverisë, Ministrisë dhe AME për ta kompensuar jo vetëm ketë dëme por edhe dëmet tjera që janë shkaktuar nga fatkeqësitë natyrore”, ka thënë Besmire Bytyqi – drejtoreshë në Drejtorin për Emergjenca
Për shkak se shtëpia është bërë e pabanueshme, familja Rexhepi aktualisht është duke qëndruar tek familjarët e vet.
