Banka Qendrore e Kosovës ka parashikuar një rritje ekonomike prej 3.9 përqind në vitin 2024. Por kjo rritje sipas ekonomistëve nuk është e mjaftueshme. Po sipas tyre, kjo është shkak që varfëria e papunësia do të vazhdojnë të jenë prezente në Kosovë.
Rritja ekonomike këtë vit parashikohet të jetë 3.9 përqind.
Kështu u bë e ditur në raportin e Bankës Qendrore të Kosovës.
E kjo rritje sipas BQK-së mbështetet në disa faktorë.
“Parashikimet e BQK-së për vitin 2024 sugjerojnë se ekonomia e Kosovës do të mbështetet nga rritja e të ardhurave reale të disponueshme, falë uljes së inflacionit, dhe rritjes së burimeve të financimit. BQK parashikon rritje ekonomike prej 3.9 përqind për vitin 2024, që pritet të mbështetet nga rritja e konsumit, investimeve dhe eksportit të mallrave dhe shërbimeve, kundrejt ndikimit negativ të importit të mallrave dhe shërbimeve në BPV”, thuhet nga Banka Qendrore e Kosovës.
Por kjo rritje ekonomike sipas ish ministrit të Ekonomisë, Haki Shatri, është e pamjaftueshme.
Prandaj sipas tij, varfëria e papunësia janë akoma në shkallë të lartë.
“Nën 7% nuk mund t’i zgjidhë këto probleme sepse janë edhe probleme të trashëgume edhe të krijuara në ditët në vijim dhe kjo mbetet që edhe një kohë pra të ballafaqohemi me telashe edhe të varfërisë edhe të papunësisë”, vlerëson Shatri.
Se nuk ka stabilitet ekonomik dhe buxhetor në vend e thotë ekonomisti Jakup Bellaqa.
“Për jetën e qytetarëve nuk është e mjaftueshme ky zhvillim ekonomik mirëpo duhet marrë parasysh edhe parametrat ekonomik të cilët i ka Kosova. Me bruto produkt ende është më e vogla në rajon edhe rritjet ekonomike në rajon përafërsisht janë të njejta. E kënaqshme kish me qenë mbi 7% rritja ekonomike e Kosovës”, shprehet ai.
Sipas ekonomistëve, për të arritur një zhvillim të qëndrueshëm ekonomik, rritja ekonomike në vend duhet të jetë dyshifrore.
