Subvencionet për kultivimin e perimeve në Kosovë janë rritur këtë vit, me fokus të veçantë në forcimin e prodhimit vendor, zgjerimin e serrave dhe rehabilitimin e sistemeve të ujitjes.
Sipas të dhënave të publikuara nga Ministria e Bujqësisë, Pylltarisë dhe Zhvillimit Rural, mbështetja për perimet në fushë të hapur është rritur nga 554 euro deri në 804 euro për hektar, pas pagesës rishpërndarëse për hektarin e parë.
Për kulturën e patates, subvencionimi ka shkuar nga 654 euro deri në 854 euro për hektar, ndërsa për perimet në serra mbështetja është ngritur nga 850 euro deri në 1,154 euro për fermerët që kultivojnë deri në një hektar.
Institucionet kanë theksuar se rritja e subvencioneve synon të zvogëlojë varësinë nga importi i perimeve.
Ministria ka bërë të ditur se në kuadër të Programit për Zhvillim Rural 2026, janë paralajmëruar edhe grante për mbjelljen e perimeve dhe ndërtimin e serrave moderne.
Po ashtu, ministria ka paralajmëruar fokus të veçantë në rehabilitimin e sistemeve të ujitjes. Pas punimeve në sistemin “Radoniqi”, prioritet pritet të jenë sistemi “Drini i Bardhë” për rajonin e Dukagjinit dhe sistemi “Iber-Lepenc” për disa komuna të rajonit qendror të Kosovës.
