Në Ditën Botërore të Higjienës Menstruale, RrGK-ja thotë se 30% e grave në Kosovë nuk mund t’i përballojnë shpenzimet për produktet menstruale.
“Në këtë ditë, vëmë theksin te rëndësia e kujdesit dhe higjienës menstruale si dhe bëjmë thirrje për ngritje të vetëdijes lidhur me vështirësitë e grave dhe vajzave që nuk kanë qasje apo nuk mund t’i përballojnë produktet menstruale. Duke ditur se deri në 30% të grave në Kosovë nuk mund t’i përballojnë këto shpenzime, RrGK ka përgatitur analizën gjinore ‘Heqja e taksave për produktet esenciale të higjienës menstruale’, përmes së cilës kërkon nga Qeveria e Kosovës që të heqë krejtësisht taksën për 18% në produketet menstruale”, thuhet në njoftim.
Sipas RrGK-së, e drejta e grave në kujdes shëndetësor të përballueshëm është e drejtë fundamentale e njeriut dhe si e tillë duhet trajtuar nga shoqëria e institucionet.
“Sot, e në çdo datë tjetër, le të kujtojmë se e drejta e grave në kujdes shëndetësor të përballueshëm është e drejtë fundamentale e njeriut, dhe si e tillë duhet trajtuar nga shoqëria e institucionet. Le t’i japim fund tabuve rreth ciklit menstrual, le t’i japim fund varfërisë menstruale”, thuhet më tej në reagimin e RrGK-së. /teve1.info/
