Në rrugën ‘Shkupi’ në kryeqytet pasditen e së martës është rrëzuar vinçi me të cilin barteshin mjetet për kryerjen e punimeve.
Fatmirësisht përveç dëmeve materiale askush nuk është raportuar i lënduar si pasojë e rrëzimit të vinçit.
Por qytetarët shprehen tejet të shqetësuar për mungesën e sigurisë.
“Nuk është hera e parë që po ndodhin gjëra të tilla. Ne qytetarët jemi shumë të shqetësuar. Duhet të ketë masa të rrepta sepse dikush ka mundur të lëndohet si pasojë e rënies së vinçit. Jemi të zhgënjyer me mungesën e përgjegjësisë” , shprehet qytetari Ramw Maloku.
Sabri Klaiqi i cili jeton në atë zonë thotë se situata është alarmuese me ndërtimet që po bëhen pa asnjë kriter.
Ai shprehen i befasuar me mungesën e përgjegjësisë nga institucionet.
“Është jashtëzakonisht shqetësim i madh kur i shohim këto ndërtime pothuajse pa asnjë kriter. Me të vërtetë kjo çfarë është duke e ndodhur me ndërtimet është e papranueshme. Mendoj shteti duhet të ndërmarrë masa urgjente”, thotë Klaiqi.
Hetimet për të zbuluar shkaqet e rrëzimit të vinçit janë duke vazhduar ende.
