Në këtë formë po detyrohet ta kalojë rrugën.
Ani pse kësisoj po e rrezikon edhe jetën.
Është kjo rruga në të cilën tani vonë u ndërtua një rrethrrotullim, në magjistralen Prishtinë – Gjilan.
Por aty, ende nuk janë vendosur vija të bardha.
Gjë që po e vështirëson kalimin e shumë qytetarëve.
Për këtë, ata po kërkojnë që zgjidhja t’u bëhet sa më parë.
“Për mendimin temë është shumë keq, duhet me pas zebra ose mbikalim për me kalu qytetarët, se shumë rrezik i madh”, shprehet Sebahate Spahiu-qytetare.
Se ky rrethrrotullim ka qenë i nevojshëm dhe tashmë ka përmirësuar qarkullimin, e thonë njohës të komunikacionit.
Por sipas Nol Dedaj, pa sinjalizimin e duhur, projekti mbetet i papërfunduar.
“Zgjidhja si projekt është jashtëzakonisht e mirë, për shkak se i ka eliminuar të gjitha pikat e konfliktit, por duhet pasur kujdes se projektin e ndërtimit duhet me e përcjell edhe projekti i sinjalizimit, sinjalizimin horizontal dhe vertikal, me i pas të sinkronizuara. Pastaj vendkalimi i këmbësorëve sigurisht që vendoset”, thotë Nol Dedaj – ekspert i komunikacionit.
Për këtë çështje, Tëvë1 ka kontaktuar edhe Komunën e Prishtinës.
Të njëjtit, në një përgjigje me shkrim kanë thënë se aktualisht janë në bisedime me Ministrinë e Infrastrukturës.
“Duke qenë se bëhet fjalë për rrugë nacionale, realizimi i vendkalimit duhet të bëhet në bashkëpunim dhe koordinim me Ministrinë. Aktualisht jemi në pritje të përcaktimit të zgjidhjes teknike, pasi realizimi i vendkalimit kërkon edhe intervenim në barrierat elastike të vendosura në këtë pjesë të rrugës”, thotë Zyhrije Pllana – drejtoreshë e Investimeve Kapitale në kryeqytet.
Rrethi i ri në hyrje të Prishtinës nga Gjilani, u përfundua në fund të muajit qershori, me synimin që të ketë lehtësim të qarkullimit rrugor.
