Punimet për ndërtimin e tij kanë nisur në fillim të muajit shkurt.
Ani pse nuk është i përfunduar tërësisht, rrethi te rruga “C” në kryeqytet është duke u përdorur për qarkullim.
E ky rrethrrotullim u bë nga Komuna që ta lehtësojë lëvizjen e ta rrisë sigurinë në komunikacion.
Por ky rreth sipas ekspertit të komunikacionit, Lavdim Hamiti, nuk do ta arrijë qëllimin e synuar nga komuna e Prishtinës.
“Në pikën ku është ndërtuar ky rreth ka qenë e panevojshme, përveç që ka me kontribu në rritjen e aksidenteve, asnjë kontribut nuk mund të ketë ky rreth këtu. Arsyeja pse është i panevojshëm është pasi kemi rrethin tek rruga ‘B’ dhe rrethin te rruga ‘C’ ku distanca ndërmjet rretheve është vetëm 900 metra”, shprehet Hamiti.
Madje ky projekt sipas Hamitit, ka bllokuar edhe dy shiritat anësor të rrugës.
“Sikurse që ka qenë një rrugë e drejtë me dy shirita në realitet tash vetëm se kanë krijuar disa pika të konfliktit që mund të ketë aksidente me dëme materiale e që mund të ndodh të me e keqja që mund të ketë ndonjë të lënduar sa i përket personave fizik. Përveç asaj është nxënë një shirit në anën e djathtë dhe një shirit në anën e majtë, pra vetëm e kanë ngushtuar rrugën, kjo bën që të shkaktohen aksidente”, vlerëson ai.
Por ky projekt, sipas drejtorit të investimeve kapitale në Prishtinë, Krenar Xhaferi, është i përkohshëm.
“Ky rreth është i përkohshëm deri në përmbylljen e të gjitha rrugëve sipas planit rregullues në atë zonë, poashtu edhe përmbylljen e rrugës ‘A’ e cila pastaj mundëson një qarkullim shumë më të lehtë të komunikimit në atë zonë. Sa i përket shpejtësisë, normalisht që duhet të ketë kujdes, pasi ajo rrugë ka një shpejtësi të lejuar dhe në kuadër të asaj shpejtësie nuk asnjë problem të rrethi ne gjendjen që është, është shënjuar dhe ndriçimi do të vendoset nga shërbimet publik me një ndreqim komplet të pjesës së rrethit”, shprehet Xhaferi.
Ndërtimi i këtij rrethi, sipas tij është bërë në kuadër të kontratave emergjente që komuna ka nënshkruar.
