Presidentja e Kosovës, Vjosa Osmani, ka vizituar sot Klinikën e Onkologjisë në Qendrën Klinike Universitare të Kosovës (QKUK), ku u prit nga stafi mjekësor dhe përfaqësuesja e organizatës “Jeta Vita”, Nafije Latifi.
Gjatë vizitës, presidentja u takua me paciente që po përballen me sëmundjen e kancerit, duke theksuar se kujdesi dhe mbështetja psikologjike janë një pjesë thelbësore e procesit të shërimit.
“Mbështetja që në pamje të parë mund të duket simbolike, në fakt ka një ndikim të madh emocional te pacientet. Vetëm këtë vit janë ndarë rreth 640 proteza për gratë që po kalojnë këtë sfidë, dhe ky është viti i katërt i bashkëpunimit tonë”, tha Osmani.
Ajo theksoi se përkushtimi i institucioneve shtetërore ndaj grave që luftojnë kancerin e gjirit nuk kufizohet vetëm në donacione, por edhe në rritjen e buxhetit për barnat esenciale.
“Çdo vit, përmes amendamenteve buxhetore, angazhohemi që të sigurojmë fonde shtesë për listën e barnave të domosdoshme, në mënyrë që asnjë paciente të mos mbetet pa trajtim”, shtoi presidentja.
