Të paktën 35 persona kanë humbur jetën ndërsa dhjetëra të tjerë janë lënduar pasi shiu dhe reshjet e papritura të borës kanë goditur zonat e thella të Pakistanit gjatë fundjavës.
22 fëmijë janë midis viktimave, shumë prej të cilëve i ka zënë rrëshqitja e dheut, thanë autoritetet, shkruan BBC.
Moti ekstrem goditi rajonet veriore dhe perëndimore të Pakistanit, duke bllokuar rrugët dhe duke dëmtuar qindra shtëpi.
Ekspertët u befasuan nga bora pasi Pakistani është zakonisht i lagësht në mars.
Mushtaq Ali Shah, ish-drejtor i departamentit meteorologjik të vendit, ia atribuoi kushtet e pazakonta ndryshimeve klimatike. Ai shtoi se një stuhi e lehtë breshëri që zgjat “për disa çaste” nuk do të ishte aq befasuese, por është e pazakontë që kjo të vazhdojë për mbi 30 minuta.
Shirat e dendur shkatërruan plotësisht të paktën 150 shtëpi dhe dëmtuan pjesërisht 500 të tjera, kryesisht në Khyber Pakhtunkhwa dhe provincën jugperëndimore të Balochistanit, thanë autoritetet.
Prej disa ditësh në disa rrethe është ndërprerë plotësisht energjia elektrike.
Qeveria provinciale e Khyber Pakhtunkhwa ka ofruar ndihma për zonat e prekura dhe ka njoftuar ndihmë financiare për të lënduarit dhe familjet e atyre që vdiqën.
