Një zjarr që ka përfshi një lokal të gomisterisë dhe më pas është përhapur në një pjesë të një lokali tjetër dhe një shtëpie ka shkaktuar dëme në vlerë rreth 20 mijë euro.
Rasti ka ndodhur në rrugën magjistrale Kaçanik – Ferizaj të dielën rreth orës 19:00.
Policia e Kosovë ka bërë të ditur se sipas të dhënave fillestare dyshohet se zjarri ka filluar nga djegia e disa gomave të vendosura jashtë lokalit.
“Sipas të dhënave fillestare, dyshohet se zjarri ka filluar nga djegia e disa gomave të vendosura jashtë lokalit, e më pas zjarri është përhapur duke përfshirë një lokal të gomisterisë, një pjesë të një lokali tjetër (me dëme të vogla), si dhe një pjesë të një shtëpie përreth. Vlera e dëmit dyshohet të jetë rreth 20,000 (njëzet mijë) euro. Hetimet lidhur me rastin janë në proces”, ka thënë zëdhënësi rajonal, Kanun Veseli.
Ai ka bërë të ditur se për rastin janë njoftuar menjëherë, njësia e zjarrfikësve ,patrullat dhe njësia e hetimeve nga stacioni policor në Kaçanik të cilët kanë dalë në vendin e ngjarjes për të ndërmarrë veprimet e nevojshme.
Veseli tha se është njoftuar edhe njësia e KEDS-it, për të ndërprerë furnizimin me energji elektrike, me qëllim të parandalimit të rrezikut të mëtejshëm.
