Rreth 140 mijë besimtarë myslimanë u mblodhën të mërkurën në oborret dhe sallat e lutjeve të Xhamisë Al-Aksa në Jerusalemin Lindor të pushtuar për të falur namazin e ditës së parë të Kurban Bajramit, festës katërditore islame.
“Numri i besimtarëve në Xhaminë Al-Aksa për namazin e Kurban Bajramit të këtij viti u vlerësua në 140,000”, tha Departamenti i Vakëfeve Islamike në Jerusalem.
Sipas një korrespondenti të Anadolu-t, forca të shumta të policisë izraelite ishin të pranishme në zonën përreth Qytetit të Vjetër të Jerusalemit Lindor, në rrugicat e tij dhe pranë hyrjeve të xhamisë.
Kurban Bajrami simbolizon gatishmërinë e Profetit Ibrahim – i njohur si Abraham nga të krishterët dhe hebrenjtë – për të sakrifikuar djalin e tij me urdhër të Zotit.
Me këtë rast, myslimanët therin kafshë si simbol i sakrificës së Profetit Ibrahim dhe mishin ua shpërndajnë familjeve në nevojë dhe komunitetit.
Këtë vit, festa po shënohet në kushte të vështira për palestinezët në Bregun Perëndimor të pushtuar dhe në Rripin e Gazës, mes luftës, bllokadës dhe përshkallëzimit të operacioneve ushtarake izraelite.
Që nga nisja e luftës në Gaza në tetor të vitit 2023, situata në Bregun Perëndimor është tensionuar ndjeshëm, me shtim të sulmeve nga ushtria izraelite dhe kolonët, sidomos në zonat rurale dhe komunitetet beduine pranë vendbanimeve izraelite.
Sipas të dhënave të publikuara të hënën nga zyra mediatike e qeverisë palestineze, rreth 1,200 palestinezë janë vrarë, mbi 12,600 janë plagosur dhe afro 33,000 janë zhvendosur në Bregun Perëndimor.
