Janë nisur drejt qytetit të Gjakovës, por rruga iu ndal në gjysmë.
Shoferët që po shkonin nga Klina në drejtim të këtij qyteti, nuk u lejuan të kalojnë.
Kjo për shkak se këtu gjatë mesnatës kishte rrëshqitje dheu.
E kjo bëri që të aktivizohet kompania mirëmbajtëse e rrugës për largimin e këtij dheu.
“Punimet për largimin e dheut që ka rrëshqitur mbrëmë gjatë mesnatës po vazhdon me intensitet të lartë ku janë angazhuar shumë eskavatorë”.
Rruga iu ndërpre edhe këtyre nxënësve nga Komuna e Vitisë të cilët kishin plan ta vizitojnë qytetin e Gjakovës.
Fillimisht ata tentuan që të kalojnë në këmbë, mirëpo kjo qe e pamundur për shkak të vështirësive për kalim.
“Sot jemi në shëtitje së bashku me nxënës, mirëpo na ra disa metra rrugë për me kalu në këmbë shkaku i rrëshqitjes së dheut kështu që ne do të vazhdojmë të ecim në këmbë dhe shpresojmë të rregullohet sa më parë dhe të vjen në gjendje ne duhur”, ka thënë arsimtari i Biologjisë, Naim Metallari.
Porse disa banorë të kësaj ane që e kaluan këtë pjesë në këmbë, thonë se edhe gjatë mbrëmjes kanë parë se kjo rrugë është në rrezik për rrëshqitje dheu.
“Kah kemi ardhë kah ora 09 gjatë kish pasë fillu mu shemb dmth kah ora 8 e gjysmë kemi kaluar këtu edhe ishim me kerr thashë sonte ka me u shemb kjo rrugë edhe më tha një qun i djalit të vëllaut tha ishe kon arkitekt se kish ndodhë dmth ka ndodhë kjo”, ka thënë qytetari.
“Na e bëmë si pytje me këta shoferët e tham a mujna me kalu na thanë që popo mundeni me kalu, jojo sjemi ndi të rrezikum se na si katunarë i dijmë këto gjëra ku është rreziku ai çka është i meqëm nuk hin në ato rreziqet e mëdha”, ka thënë qytetari, Qamil Gashi.
Në vendngjarje doli edhe përfaqësuesi i Ministrisë së Infrastrukturës, Qamil Feka.
Ai deklaroi se janë duke bërë përpjekje që deri në fund të ditës rruga të jetë pjesërisht e kalueshme.
“E keqja e kësaj është pse ka ndodhë, e mira është se nuk ka pasur viktima e para, e dyta që kompania është në aktivitet të plotë për të hapë rrugën dhe me aktivitetin e sotshëm dhe ditën e nesërme por deri në përfundim të këtij projekti do të jetë me kujdes të veçantë nga shfrytëzuesit e saj qoftë me automjete të rënda apo private qoftë si këmbësor”, ka deklaruar ai.
Derisa shton se nuk janë në dijeni për shkaqet që kanë çuar deri në këtë shembje.
“Ekspertiza do ta thotë fjalën e vet mbi arsyet, nuk jam këtu për të identifikuar arsyet këtë do ta bënë ekspertiza një raport i veçantë nga Kompania pastaj edhe nga ministria për arsyet shkaqet pasojat dhe aktivitetin, rekomandimet që do duhet të mirren në mënyrë që kjo rrugë të jetë e sigurt”, tha Feka.
Punimet në rrugën për Gjakovë ka më shumë se 2 vite që janë duke u zhvilluar për zgjerimin e saj.
