Ky organ dënoi me 3 vite burgim e 2 mijë euro gjobë ish inspektoren e ndërtimit në Komunën e Prizrenit tani deputeten e Vetëvendosjes, Jetmire Vranezin me akuzën për keqpërdorim të detyrës zyrtare.
Ndërsa për të njëjtën akuzë, u shpall fajtor edhe ish-shefi i saj, Islam Thaçi.
Sipas Gjykatës, këta rrënuan një aneks të ndërtuar pa leje, për të cilën pronarët pas ndërtimit, kishin aplikuar për legalizim.
Ndërkohë avokati mbrojtës i deputetes Vranezi, thotë se vendimi i gjykatës ka qenë i habitshëm për ta.
“Mendojmë që nuk ka asnjë element të veprës penale, e njëjta akuzuar për nxjerrjen e një konkluzioni për rrënim e cila ka qenë në kuadër të kompetencave dhe ka qenë obligim i saj të nxjerrë, lidhur me rrënimin e një pjesë të Abi Çarshia që ka qenë pa leje”, tha Urim Vokshi, avokat i deputetes Jetmira Vranezi.
Për këtë vendim, thonë se do të dërgojnë ankesë në Gjykatën e Apelit.
“Presim që ta pranojmë në formë të shkruar, do të dërgojmë ankesë në Gjykatën e Apelit”, shtoi ai.
Por, a mund t’ia humb ulësen e deputetes, Jetmira Vranezit, ky vendim i gjykatës?
“Është vendim i shkallës së parë, nuk ka pasoja juridike…”, tha Yll Zeka, nga Instituti i Kosovës për Drejtësi.
Ndërkohë për këtë çështje, Gjykata Themelore në Prizren, ka liruar nga akuza 5 ish-zyrtarë të tjerë komunal, ngase sipas tyre, nuk është provuar se kanë kryer veprën penale keqpërdorim i pozitës apo autoriteti zyrtarë.
Raporti i gazetarit Fidan Zejnullahu.
