Eksperti i sigurisë dhe marrëdhënieve ndërkombëtare, Ilir Kulla, në emisionin “Matrix” në Tëvë1, ka folur për ndikimin e luftës në Ukrainë në politikën e jashtme të Shteteve të Bashkuara dhe tensionet në Amerikën Latine, veçanërisht në raport me Venezuelën.
Sipas Kullës, pa luftën në Ukrainë, SHBA-ja nuk do ta kishte humbur mbështetjen e një numri të madh të vendeve gjatë presidencës së Joe Bidenit.
“Nëse nuk do të ishte lufta në Ukrainë, Amerika nuk do ta kishte humbur shumicën e vendeve gjatë presidencës së Bidenit. Kjo e shpjegon edhe pse sot SHBA-ja ka vendosur bllokadë detare dhe ajrore ndaj Venezuelës, duke e vënë këtë shtet nën stres dhe presion, pasi Venezuela ka probleme të brendshme”, ka deklaruar Kulla.
Ai ka ngritur pikëpyetje nëse në të ardhmen mund të ketë përplasje më të mëdha mes Amerikës së Veriut dhe asaj të Jugut, duke pasur parasysh se shumë regjime në Amerikën Latine janë kundër politikave amerikane.
“Mbetet për t’u parë nëse do të kemi një fillim konflikti mes Amerikës së Jugut dhe asaj të Veriut, ku shumica e regjimeve janë antiamerikane. Një gjë është e qartë: nëse nuk bie qeveria dhe presidenti Maduro, ai nuk do të rrëzohet kurrë”, ka thënë Kulla.
Sipas tij, regjimi i presidentit venezuelian përfaqëson një konglomerat të fuqishëm politik dhe ushtarak, i cili e bën shumë të vështirë ndërhyrjen amerikane në Amerikën Latine dhe rikthimin e ndikimit që SHBA-ja ka pasur në vitet ’60 dhe ’70 në këtë rajon.
