Për pesë vite me radhë shoferët e automjeteve kanë paguar miliona euro kompanive të sigurimeve.
E gjithë kjo pas ndryshimit të rregullores Bonus- Malus nga Banka Qendrore, në vitin 2020, e cila i detyronte pronaret e makinave të paguanin më shtrenjtë në rast të vonesave në regjistrim.
Por nga 4 gushti, një gjë e tillë do të ndryshojë.
E gjithë kjo pasi Avokati i Popullit i kërkoi BQK-së të ndryshojë pikat të cilat kufizonin të drejtën e ngasësve të automjeteve për marrjen e bonuseve apo uljen e tarifës për sigurimin e veturës.
Ky vendim është mirëpritur nga Dhoma e Tregtisë dhe Industrisë.
Por ata kanë kërkuar një sqarim nga Banka Qendrore e Kosovës.
“Pyetja jonë është se a do të ja kthejë dikush mjetet atyre personave të cilëve iu janë marrë parat në emër të atyre paragrafëve. Për këtë nuk është dhënë asnjë sqarim as në vendimin e BQK-së që rregullorja me këto ndryshime do të hyjë në fuqi nga një gushti”, tha Kushtrim Ahmeti nga Dhoma e Tregtisë dhe Industrisë.
E kësaj pyetje nga Banka Qendrore e Kosovës nuk iu janë përgjigjur as televizionit.
Mirëpo me këto ndryshme nuk po pajtohet juristi, Anton Nrecaj.
“Për lirimin e paafatshëm te regjistrimit kjo është e papranueshme realisht. Kjo është vetëm konsum, nuk e di çfarë kanë menduar. Se imagjinoni një vozitës të dalë në trafik me një makinë e cila i ka skaduar afati i regjistrimit, nuk ka as sigurim të automjetit, cilat janë pasojat?! Kjo nuk ia lehtëson aspak jetën qytetarit apo vozitësit që del me makinë në trafik”, Nrecaj.
Por cilat ishin arsyet e marrjes së këtij vendimi në atë kohë?
“Vendimi është marrë më shumë për me i detyru njerëzit me regjistru me kohë automjetet, meqenëse në atë kohë Kosova ka qenë duke lënguar shumë prej numrit të automjeteve që kanë qenë të paregjistruara dhe në atë periudhë Kosova ishte në diskutime me dy shtete të cilat do ta përfaqësonin Kosovën për të marrë kartonin e gjelbër në pronësi”, tregon Ahmeti.
Si praktikë ndërkombëtare, sistemi “Bonus-Malus”, merr për bazë një histori njëvjeçare të shoferëve dhe në bazë të aksidenteve të shkaktuara.
Një person që nuk shkakton aksident në komunikacion shpërblehet me ulje të shumës së pagesës për sigurimin e automjetit dhe hynë në kategorinë bonus, ndërsa ata që bëjnë aksidente paguajnë më shtrenjtë dhe hyjnë në kategorinë malus.
